Fenómenu eklipse solar, sientista besik 100 reserva ona fatin iha Timor-Leste
DILI, 09 fevereiru 2023 (TATOLI)— Asesór Espesialista Turizmu, Manuel Vong, hateten, relasiona ho fenómenu eklipse solar híbridu ne’ebé sei akontese iha 20 abril 2023, daudaun ne’e ema sientista besik 100 reserva ona fatin iha Timor-Leste.
“Tuir dadaus ne’ebé operadór turistika sira rekolla, provizóriu sientista sira ne’ebé hakarak mai partisipa hodi haree fenómenu eklipse solar ne’e, besik 100 mak booking (reserva) ona fatin maske sira seidauk mai,”Manuel Vong hateten iha Farol, Dili, kinta ne’e.
Nia dehan, sientista sira ne’ebé booking ona fatin no fiksu atu mai ne’e mai hosi nasaun sira hanesan Amérika, Rúsia, Espanól, Alemána, Itália no barak liu mak hosi Austrália. No hosi Indonésia sei mai ne’e hosi Intitutu Teknolójia Bandung.
Nia dehan, aleinde sientista sira mai, iha mós ró kruzeiru tolu sei mai maibé hosi nasaun ne’ebé sei iha prosesu nia-laran.
“Liuhosi fenómenu ida ne’e, ita tenke agradese iha momentu ida ne’e fó benefísiu direita ba ita iha nivel mundiál tanba durante ne’e ema barak la koñese Timor-Leste. Maibé ho fenómenu ida ne’e ema sei hatene ita-nia nasaun, kultura no istória,” nia dehan.
Asesór Espesialista Turizmu ne’e dehan, preprasaun Governu nian daudaun ne’e, ekipa téknika sei prepara hela baze atu ba aprezenta iha Governu hodi hetan aprovasaun.
Iha fatin hanesan, Manejer Timor Indigenous Tours, Jónias Exposto, hateten, sira-nia parte pronto simu turista sira ne’ebé sei mai tanba daudaun ne’e sira-nia parte mós hetan ona booking hosi turista balu.
Nia dehan, iha númeru ne’ebé mak ajénsia liuhosi operadór turístiku hetan, mak kada ajénsia balu hahú hetan ona vizitante 40, no balu hahú hetan hosi númeru na’in haat to’o 10 vizitante ne’ebé mak hanesan astrónomu no jornalista internasional balu ne’ebe atu mai foti filmajen no informasaun direita iha terrenu.
“Ami hetan booking ne’ebé direita ka ofisialmente hetan ona fatin besik ema na’in 100. Ida ne’e fiksu booking hosi People To Business (PTB). Maibé ba Timor Indigenous Tours foin mak hetan ema nain neen. Sira ne’e jornalista hosi Itália, Fransa, no Austrália,” nia dehan.
Kona-ba presu fatin ne’ebé vizitante sira booking ona, tama ba pakote. Signifika alojamentu, hahan, no tour loron hira. Pakote ne’ebe halo iha rua. Pakote ida booking ba loron hitu nian no ida tan ba loron tolu.
“Ne’ebé sira mai iha loron 17 abril 2023, sai hosi Dili ba Baucau. Iha loron 18 abril 2023 ba Com-Lautém deskansa no iha loron 20 abril 2023, ita asiste fenómenu eklipse solar. Ne’ebé kustu ba pakote sira ne’e, ba loron tolu hetan $2.000 no semana ida nian ninia kustu liu $2.000,” nia hateten.
Jornalista : Arminda Fonseca
Editora : Armandina Moniz
