Top

TDD mantein rona sasin ba kazu eis-Ministru MCIA Costancio Pinto

TDD. Imajen Tatoli /Dok

DÍLI, 09 fevereiru 2022 (TATOLI) – Tribunál Distritál Dili (TDD) kontinua halo julgamentu ba eis-Ministru Komérsiu Indústria Ambiente (MCIA) Costancio Pinto, ba kazu partisipasaun ekonómika iha negósiu ne’ebé envolve mós hosi arguidu nain-rua hanesan eis-Diretór Jerál Indústria no Kooperativa MCIA, António da Costa inklui Diretór Kompañia Stard Prodact Uni Pessoal Lda.

Iha julgamentu, Tribunál rona depoimentu hosi sasin Izac Menezes hanesan kordenadór apoiu jurídiku iha Ministériu Finansa.

Sasin Izac Menezes nia kna’ar hodi fó asesoria ba Minstru Finansa ba kestaun ne’ebé elabora pareser jurídiku, halo revizaun no mós sensibilizasaun ba lei ne’ebé iha.

Sasin hateten, la iha relasaun família ho arguidu nain-tolu.

Hatan kona-ba kazu konkretu ba prosesu MCIA nian, sasin deklara, kona-ba prosesu ne’e sasin iha koñesementu banhira simu karta ida hosi MCIA iha loron 20 fulan setembru 2016, bainhira Ministra Finansa fó despaisu ida ba sira hodi hato’o pareser.

“Kona-ba asuntu ne’e iha momentu ne’ebá ha’u hato’o pareser ba Ministru Finansa katak lei la fó dalan atu atribui pagamentu ba Kompañia Star Product Unip.Lda, tanba empreza ne’e iha lukrutivu”, Asesór Juridiku MF Izac Menezes deklara iha Sala Julgamentu TDD, kinta ohin.

Bazea ba dekretu Governu númeru 1/2009, 18 de fevereru ne’ebé koalia kona-ba subvensaun ne’e iha artigu 12 hateten subvensaun ne’e bele aloka ba setór públiku no setór privadu.

Ba setór privadu maka hanesan ba grupu komunitáriu sira no NGO sira no ema sira ne’ebé la iha fundu lukrutivu. Nune’e, pareser ne’ebé sasin hato’o ba Ministru Finansa, momentu ne’ebá lei la fó dalan atu atribui pagamentu ba Kompania Star Product Unip.Lda, tanba empreza ne’e iha lukrutivu.

“Iha momentu ne’e, ha’u haruka fila fali pareser ne’e ba Ministra Finansa Santina Cardoso, maibé tanba momentu ne’ebá nia auzensia hela, tanba ne’e ha’u hato pareser ne’e ba fali Vise Ministru Helder Lopez no momentu ne’e Vise Ministru Finansa ne’e halo tiha aprovasaun ba pareser ne’e no nia informa kedan mai ha’u atu enkamiña pareser ne’e ba MCIA”, Izac haktir.

Tanba ne’e, iha loron 3 fulan dezembru notifika kedan pareser ne’e ba Diretór Jerál Indústria no Kooperativa MCIA Antonio da Costa no señora Laila maka simu pareser ne’e iha loron 4 fulan dezembru 2016.

Sasin haktuir tán, momentu ne’ebá karta ne’ebé maka hosi MCIA ba Minitériu Finansa iha karta ne’e nia konteudu hakerek katak pedidu aprovasaun pagamentu MF ba kompañia Star Prodact no iha pedidu ne’e MCIA konsta kedan ho dokumentu hosi kompañia nian hanesan karta lisensa ba atividade.

Maibé bainhira gabinete juridiku Ministériu Finansa haree tiha pedidu ne’ebé MCIA aprezenta ba MF ne’e iha momentu ne’ebá parte jurídiku MF rejeita no husu Ministériu Finansa labele halo pagamentu ba kompañia refere, tanba la priénse regra tuir dekretu ne’ebé iha kona-ba subvensaun públika nia, tanba ne’e kompañia ne’e MF labele halo pagamentu.

“Bainhira Ministériu Finansa deside halo pagamentu daruak ba kompañia Estar Prodact Lda bazea ba pedidu hosi Ministru MCIA momentu ne’ebá ba MF atu halo pagamentu, hanesan asesór juridiku, ha’u laiha koñesimentu, tanba ida ne’e iha ona desizaun nivél altu nia. Ha’u nia só to’o de’it oinsá atu fó pareser, liu ida ne’e mak oinsa oinsa ne’e, laos ha’u nia kompeténsia, tanba ne’e laiha koñesimentu”, Asesór Izac Menezes katak.

Hafoin Tribunál rona tiha parte arguidu nia depoimentu sira, Tribunál adia hikas julgamentu ne’e ba loron 8/3/2023 oras tuku 14:30 hodi rona sasin seluk.

Audiénsia julgamentu ne’e prezide hosi juiz koletivu José Goncalves, Argentino Nunes, Alvaro Maria, Ministériu Públiku reprezenta hosi Prokuradora Lidia Soares no arguidu sira hetan asisténsia hosi Marcal Mascarinhas no advogadu privadu ida.

Jornalista: Natalino Costa

Editór : Zezito Silva

 

Publisidade

Leave a Reply

Latest Post

error: Content is protected !!