DNGM alerta to’o semana oin velosidade anin hosi normal-maka’as
DILI, 10 fevereiru 2023 (TATOLI)—Ministériu Transporte no Komunikasaun (MTK), liuhosi Diresaun Nasional Meteorolójia no Jeofízika (DNMG, sigla portugés), fó previzaun tempu hahú semana ne’e to’o semana oin iha velosidade anin hosi normal to’o maka’as.
Atualizasaun previzaun tempu hahú 10-14 fevereiru 2023, sei hatudu previzaun ba anin no laloran tasi, ne’ebe atensaun espesiál ba anin iha kosta norte no súl sei iha velocidade anin kontinua varia hosi normal to’o maka’as 10-38 km/h akompanha ho rajadas ka anin fuik ho nia intensidade boot liu 57 km/h.
Hosi velosidade anin normal ba makaas ne’e, iha rejiaun kosteira ka tasi ibun sira hahú semana ne’e to’o seman oin, no intensifikasaun anin refere sei influénsia mós tasi aas.
“Nafatin apela ba ita-nia Públiku liuliu ba sira ne’ebé lokaliza iha tasi ibun inklui transporte maritima hodi tau atensaun ba kondisaun tasi ne’ebe sei a’as iha semana ne’e no semana oin tantu iha kosta norte no súl,” isplika hosi nota komunikadu ne’ebe Agência Tatoli, asesu, sesta ne’e.
Bainhira akontese anin bo’ot husu ba populasaun sira hadook aan nafatin hosi fatin risku sira no buka hela fatin ne’ebé seguru.
Jornalista : Arminda Fonseca
Editora : Armandina Moniz
