iklan

INTERNASIONÁL, DILI, HEADLINE

TL aprezenta esperiénsia sistema kontrolu imigrasaun iha reuniaun Bali Process

TL aprezenta esperiénsia sistema kontrolu imigrasaun iha reuniaun Bali Process

Bandeira RDTL. Imajen/Espesiál

DILI, 10 fevereiru 2023 (TATOLI) – Governu Timor-Leste, liuhosi Vise-Ministru Interiór, Antonio Armindo, hetan oportunidade hodi fahe esperiénsia iha konferénsia Bali Process kona-ba sistema kontrolu imigrasaun, problema fronteira terrestre, rezolve migrasaun ilegál ne’ebé bele sai hanesan tráfiku umanu, kombate krime husi autór rede krime organizadu sira no krime transnasionál sira seluk.

“Timor-Leste, nudar nasaun ki’ik ida-ne’ebé lokaliza entre rejiaun Pasífiku no Sudeste Aziátiku, iha problema signifikante ida ho tráfiku umanu ne’ebé envolve vítima estranjeiru no doméstiku sira, kontrabandu ema inklui hakat liu fronteira ho ilegalmente”, Vise Ministru dehan liuhosi komunikadu ne’ebé Agência TATOLI asesu, ohin.

Nia hatutan, kondisaun ekonómia ne’ebé fraku no oportunidade edukasaun ne’ebé limitadu, hafasil tebes lori povu ba vulnerabilidade. Ida-nee la’ós atu dehan katak feto no labarik-feto sira partikularmente vulnerável no afetadu ho impaktu ne’ebé la proporsionál.

Iha situsaun ida ne’e, Governu Timor-Leste latur nonok, hanesan membru Governu iha kompromisu bo’ot atu responde ba ida-nee, maibé  hatene katak intensaun no asaun hirak ne’e presiza mós tulun hosi belun internasionál sira.

Pandemia virus Covid-19, hanesan mundu tomak hatene, la iha ida-ne’ebé di’ak liu no iha kazu ida-ne’e halo aat liután dezafiu sira ne’ebé Governu hasoru hodi rezolve tráfiku umanu no lakuna ne’ebé bo’ot no aumenta violénsia bazea ba jéneru.

“Maibé Governu Timor-Leste kontinua asegura katak jestaun fronteira ne’ebé efetivu sai nu’udar prioridade no hatudu ona esforsu atu responde ba tráfiku umanu no ita konsidera impaktu husi pandemia Covid-19 ba ninia kapasidade anti-tráffiku”, nia tenik.

Tuir nia, Governu mós la mesak iha ninia luta hasoru problema tráfiku umanu tanba iha tinan hirak ikus ne’e, Governu Austrália estende ona apoiu krítiku ba Governu Timor-Leste no ninia parseiru prinsipál Organizasaun Internasionál ba Migrasaun (OIM) halo formasaun oioin hodi responde ba tráfiku umanu.

“Ami-nia adezaun ba Bali Process mós hetan valór no ami hein katak ida-ne’e sei promove kolaborasaun rejionál ne’ebé bo’ot liu no mós kooperasaun bilaterál hodi rezolve kestaun krime transnasionál sira ne’e”, nia dehan.

Hafoin ratifika Konvensaun Nasaun Unida kontra Krime Organizadu Transnasional iha tinan 2009, Governu Timor-Leste aprova ona lejislasaun rua mak hanesan Lei No. 3 2017 kona-ba Prevensaun no Eliminasaun Tráfiku Umanu no Lei No. 11 2017 kona-ba Imigrasaun no Aziliu hodi hametin regulamentu sira iha Kódigu Penál nian.

Desde tinan 2016, Timor-Leste hetan apoiu hosi OIM hodi fó formasaun atu hasa’e kapasidade ba ema na’in 660 kompostu hosi ofisiál Governu, servisu sosiál sira, ONG no majistradu sira kona-ba dezenvolve no reforsa kapasidade nasionál sira ba fiskalizasaun no referénsia hodi asegura protesaun efetiva ba vítima tráfiku (VoTs).

Iha tinan 2021, Governu promulga Dekretu-Lei Nu. 9 ne’ebé estabelese Komisaun Kombate Tráfiku Ema (KLATU), ne’ebé responsável ba koordena esforsu Governu nian ba kombate tráfiku umanu.

KLATU dezenvolve ona planu ida atu estabelese Sekretariadu PAN 1325 nian ne’ebé tutela Ministériu Interiór nia okos no remata ona Planu Asaun Nasional Anti-Tráfiku ba tinan 2022, no agora daudaun ofisiál sira dezenvolve no hametin di’ak liután Planu Asaun Nasionál 1325 iha prevensaun no rezolusaun konflitu sensivel ba jéneru, prevensaun ba tráfiku umanu hodi hahú integra ho Tráfiku umanu durante tinan lima nia laran hahu hosi tinan 2022-2026.

Iha tinan 2022 nia rohan, Governu Timor-Leste mós adopta Dekretu-Lei ida-ne’ebé permite atu foti medida hodi proteje sidadaun timor oan sira iha estranjeiru inklui apoiu konsular no emerjénsia ba ema vulneravel sira iha diaspora. Aleinde nee, kriasaun Sekretaria Estadu ba Komunidade Timor-Leste iha Estranjeiru iha tinan 2022 fó dalan ba ita-nia esforsu sira atu asegura katak ita bele apoia timoroan rihun ba rihun ne’ebé hela iha estranjeiru.

“Ami mós lansa ona Prosedimentu Operasaun Padraun dahuluk (SOP-sigla ingles) kona-ba Identifikasaun Vitima no Mekanizmu Referal ba tráfiku umanu, hafoin hala’o konsulta lubuk ida ho parte interesada sira husi instituisaun governu nian to’o organizasaun sosiedade sivíl. Iha totál ofisiais fronteira no ofisiais lei na’in 42 hetan formasaun nu’udar formador no reprezentante sira husi ajénsia fronteira, fornesedór servisu no komunidade fronteira na’in 158 hetan formasaun hodi opera SOP ne’e rasik,”aumenta.

Governu mós hasa’e ona konsiénsia entre ajénsia sira ne’ebé ezekuta lei kona-ba aspeitu lejislasaun importante sira no mós SOP sira, atinje pelumenus fornesedór servisu hamutuk 147, komunidade fronteira no ofisiál sira ne’ebé ezekuta lei iha área postu fronteira ofisial 3 ne’ebé eziste iha Timor-Leste.

Governu Timor-Leste hamutuk ho OIM, fahe informasaun kona-ba migrasaun seguru no risku husi tráfiku umanu liuhusi anúnsiu públiku nian iha rádiu nasionál no mós liuhusi dizmina direta ba joven sira ne’ebe buka oportunidade ba servisu no eskola iha rai-li’ur tanba joven sira ne’e maka vulnerável liu ba tráfiku umanu.

Aleinde ne’e durante halo parseria ho Governu Australia no OIM, Timor-Leste lansa ona sistema foun ida hanaran Sistema Analiza Dadus Informasaun no Migrasaun (MIDAS), iha tinan 2022. MIDAS implementa hela hodi hatán ba preokupasaun ne’ebé mosu durante diálogu Bali Process kona-ba kombate iregularidade migrasaun iha Azia Pasifiku.

MIDAS implementa ona iha Pontu Entrada Prinsipal (BCP) 5 iha Timor-Leste ho objetivu hodi halo monitorizasaun eletronikamente ba pasajeirus sira ne’ebe tama no sai liu husi postu integradu Migrasaun nian iha teritoriu nasional no hametin kapasidade hodi identifika ba ema ne’ebé indika ba tráfiku umanu no kontrabandu liu husi kolesaun dadus ba modelu krime iha nasaun ka rejiaun.

MIDAS mós sei reforsa kompriensaun governu nian kona-ba modelu fraude dokumentus no identidade, liuhosi reforsa análiza ba inspesaun sekundária.

“Ita rekoñese katak tráfiku umanu nu’udar problema kompleksu ida-ne’ebé iha abut kle’an iha igualdade sosio-ekonómiku ne’ebé sei la mosu tanba akontesimentu lubuk ida inklui dezastre, kiak no inserteza ekonómika. Problema kompleksu ida presiza solusaun ida-ne’ebé komprensivu hodi rezolve obstákulu ba igualdade jeneru liu-liu ba feto no labarik-feto sira no ida ne’e presija ema hotu nia esforsu hamutuk ho Governu. Tinan ida-ne’e ami kompromete atu haluan ami-nia kooperasaun servisu hodi halo prevensaun no responde ba tráfiku umanu parseria ho ajénsia espesializada sira hanesan UN Women iha Timor-Leste,” haklaken.

Timor-Leste iha ona kompromisu uza medida preventiva iha kontekstu luta kontra tráfiku umanu no dala ida tan aproveita oportunidade ne’e hodi agradese ba Bali Process Governu no organizasaun internasionál sira ne’ebe durante ne’e fo apoiu ba Governu Timor-Leste.

Jornalista:Hortencio Sanchez

Editór : Zezito Silva

iklan
iklan

Leave a Reply

iklan
error: Content is protected !!