CCI-TL realiza konferénsia daruak iha Munisípiu Baucau
BAUCAU, 11 fevereiru 2023 (TATOLI) – Kamara Komérsiu Indústria Timor-Leste (CCI-TL, sigla Portugés) sábadu ne’e, realiza konferénsia daruak hodi hili estrutura foun ba períodu tinan-2023 to’o 2027 iha Munisípiu Baucau.
Vise prezidente CCI-TL asuntu agrikúltura peska, pekuaria, plantasaun, indústria médiu empreza, Rui Castro, esplika Munisípiu Baucau foin realiza konferénsia daruak hafoin tinan-12.
“Sira hotu sei aprende hosi tinan-12 no ha’u fiar sei hili estrutura foun ida ne’ebé di’ak liu, Baucau tenke ba oin”, Vise prezidente CCI-TL, hateten iha Sentru Konvensau Baucau (CCB, sigla Portugés), sábadu ne’e.
CCI-TL nu’udar parseiru inportante ba Governu tantu nasionál no lókal tanba ne’e labele sai opozisaun no tenke kolabora nafatin hodi dezenvolve Timor-Leste iha futuru.
Estrutura CCI-TL atúal iha programa importante hanesan fó prioridade ba setór produtivu liuliu halo investimentu iha agrikultura, turizmu, indústria kreativa atu struturu CCI foun tenke kria planu investimentu produtivu hodi dezenvolve iha munisípiu Baucau.
“Esperansa ba foin mak Baucau oan barak sei halo investimentu iha setór produtivu hanesan agrikultura, turizmu no indústria kreativa seluk”, Rui Castro enkoraza.
Governu prevé orsamentu hamutuk millaun $ 500 iha Banku Nasionál Komérsiu Timor-Leste hodi fó oportunidade ba emprezáriu hotu inklui Baucau oan hodi asesu ba kréditu ho funan pursentu tolu kada tinan ho objetivu atu halo investimentu no kria kampu servisu ba timoroan.
“Ita re-organiza de’it estrutura atu setór privadu bele organiza aan di’ak liután liuliu Baucau oan”, Rui Castro akresenta.
Prezidente CCI-TL Baucau, Estanislau Maria Quintas da Costa : “Ita koko no buka hadia liuliu ba tuir polítika nasionál katak atu hadia CCI iha munisípiu hotu inklui Baucau”.
Durante mandatu tinan-14, CCI Baucau konsege kria ativida ba formasaun hosi emprezáriu kiik to’o bo’ot, rezolve problema entre emprezáriu no harii asosiasaun emprezáriu Baucau oan.
Diretór kompañia Meqxa unpesál,Lda, Paulino Watumisa, liuhosi konferénsia ba daruak CCI Baucau bele hili esturutura foun ne’ebé iha vizaun atu organiza emprezáriu Baucau hotu atu bele sai parseiru ho autoridade lókal no Governu.
“Sujere emprazáriu Baucau hotu atu halo investimentu iha setór produtivu ne’ebé seidauk book nune’e bele ajuda ita-nia Governu liuliu autoridade Baucau”, Paulino enkoraza.
Partisipa iha konferénsia refere hanesan Prezidente autoridade munisipál Baucau, Olivio ‘Bou-Lesa’ Freitas, Autoridade postu admistrativu, autoridade seguransa, CCI-TL nasionál no kongresista hamutuk nain-150 kompostu asosiasaun emprezáriu ualu maihosi postu admistrativu neen, emprezáriu seluk hosi tipu negósiu 12 ne’ebé reprezenta nain-haat hosi tótal emprezáriu hamutuk 500 resin ne’ebé rejistradu.
Jornalista : Natatalino Belo
Editór : Zezito da Silva
