MOP sertifika alkatraun iha Viqueque, hein ekipa tékniku fila hosi Indonézia
DILI, 12 fevereiru 2023 (TATOLI)—Ministériu Obra Públika (MOP) liuhosi Departamentu Peskiza no Dezenvolvimentu, sei hein ekipa tékniku fila hosi Indonézia hafoin sertifika ekipamentu alkatraun ne’ebé monta ona iha mota Bebui, postu administrativu Uatulari, munisípiu Viqueque.
Xefe Departamentu Peskiza no Dezenvolvimentu hosi MOP, Isabel Maria Alves, hateten, relasiona empreza Hela Mula Unip,Lda no Greo Unip, Lda ne’ebé hein sertifikasaun hosi MOP hodi fui alkatraun ba estrada Uatulari, semana oin sira-nia tékniku sei ba Indonézia atu sosa ekipamentu laboratóriu MOP nian fila mai mak dezloka ba Viqueque.
“Atu garante alkatraun kualidade ka lae, ne’e só ekipa tékniku laboratóriu mak bele maibé semana oin, sira na’in-rua sei ba Indonézia atu survei ba ami-nia ekipamentu atu sosa iha tinan ne’e, ne’ebé ita garante fulan ida-ne’e hein fila mai mak ba haree, ekipamentu ne’ebé empreza sira monta ona ne’e,” Isabel Marai Alves ba Agência Tatoli, liuhosi telefónika, domingu ne’e.
Nia dehan, empreza sira tenke hein tékniku na’in-rua ne’e tanba sira na’in-rua mak hatene kualidade, materiál alkatraun nian no temperatura sira-ne’e hotu.
Maibé daudaun ne’e empreza sira hakarak rega uluk de’it alkatraun ne’e bele tanba ida ne’e tékniku MOP nian iha bele ba, maibé ida atu prodús haree nia kualidade ne’e hein ekipa tékniku fila lai.
“Ita husu, empreza sira tenke hein tékniku tanba antes ne’e, tékniku sira ba uluk haree empreza sira-nia mákina produsaun alkatraun ne’ebé monta ne’e, natoon koko ne’e nia temperatura tún derrepente, entaun ita deskonfia fallansu iha mákina, haruka sira tenke hadi’a” nia dehan.
Notisia Relevante : https://tatoli.tl/2023/02/08/empreza-hein-sertifikasaun-hosi-mop-hodi-fui-alkatraun-ba-estrada-uatulari/
Jornalista : Arminda Fonseca
Editór : Evaristo Soares Martins
