APC apoia ona nesesidade ba vítima inséndiu iha Becora

DÍLI, 13 fevereiru 2022 (TATOLI) – Diretór Relasaun Externa no Komumikasaun Autoriedade Protesaun Sivíl (APC, sigla portugés), Anacleto Caetano, dehan ekipa APC fó ona apoiu ba vítima hosi inséndiu, iha Aldeia Kakeu-Laran, Suku Becora, Postu Administrativu Cristo Rei, Munisípiu Díli.
“Xefe família hamutuk 14 mak sira nia uma ahi-han, iha kinta (9/2) semana kotuk, agora família sira ne’e, hetan ona apoia ai-han hosi Autoriedade Protesaun Sivil”, Diretór Relasaun Externa APC, Anacleto Caetano, hateten ba jornalista sira iha edifísiu APC Caicoli, segunda ohin.
Nia rekorda, hafoin inséndiu, APC Munisípiu Díli halo kedan levantamentu dadus ba vítima afetadu sira ba dezastre inséndiu ne’e.
“Ami nia ekipa Autoriedade Protesaun Sivíl Munisípiu Dili halo kedan levantametu dadus no iha sesta (10/2), iha tuku 11:00 ami halo kedan intervensaun hodi apoia materiál food no non food ba ita-nia komunidade sira iha Becora ne’ebé afeta ba insendiu ne’e”, nia esplika.
Nia akresenta, APC sempre disiponível hodi fó apoia emerjénsia ba sé de’it mak afetadu ba dezastre naturál.
“Ami nia ekipa iha munisípiu sira sempre prontu atu fó apoia ba komunidade sira ne’ebé hetan dezastre naturál”, Anacleto Caetano hateten.
Jornalista: Natalino Costa
Editór : Zezito Silva

