Deputada KHUNTO preokupa ho kazu dengue iha TL
DILI,13 fevereiru 2023 (TATOLI) – Deputada Bankada KHUNTO Irene Gonzaga, preokupa ho kazu dengue ne’ebé númeru aas iha ospitál sira iha teritóriu nasionál.
“Agora daudaun tempu udan, kazu dengue sa’e maka’as no ita haree ospitál sira hahú labarik barak baixa, maibé ita seidauk haree parte saúde nian kona-ba intervensaun ba fatin sira ne’ebé mak risku”, Deputada KHUNTO Irene Gonzaga, dehan bainhira debate urjénsia ho MS iha Parlamentu Nasionál, ohin.
Nia husu ba parte saúde atu keta tur nonok tanba agora daudaun tempu udan, bee nalihun barak hodi hamosu kazu dengue barak iha Timor-Leste.
Hatan ba preokupasaun ne’e, Ministra Saúde Odete Maria Freitas Belo, hateten MS la tur nonok maibé kontinua servisu ba kazu dengue mosu iha 2022, nafatin halo servisu kona.ba fomigasaun iha área risku sira ne’ebé mak profisionál saúde identifika.
“Ita nia aimoruk fomigasaun no abate sufisiente hodi hatan ba kazu sira ne’e, maibé problema mak fila fali ba ita ida idak nia konsiénsia tanba susuk moris ne’e depende ba ita ema ida idak nia uma-laran no bairo tenke moos, maibé reliadade ita haree ita nia komunidade barak moris soe foer arbiru, hanesan kalen at, roda at sira, entaun susuk nafatin moris”, Odete Belo dehan.
Nia afirma, kona -ba suntu dengue la’os MS nia servisu mesak, maibé servisu hamutuk ho administradór munisípiu sira iha obrigasaun atu haree komunidade sira nia moris ne’e, tanba MS hato’o de’it informasaun kona-ba limpeza jerál, maibé administradór nia servsiu mak hodi aviza tama sai uma atu limpeza iha ida idak nia uma hodi halo prevensaun ba dengue.
“Pelumenus tanke bele fase semana ida dala ida, hikas ropa halo di’ak ho buat sira ne’e simples maibé ida ne’e komunidade sira la halo”, nia esplika.
Nune’e, iha fulan janeiru, MS rejista kazu dengue hamutuk 84 iha munisípiu neen hanesan Baucau,Dili Liquiça, Manufahi, Bobonaro no Viqueque.
Jornalista : Felicidade Ximenes
Editór : Zezito Silva
