DNMG alerta semana ne’e kontinua udan hosi intensidade fraku to’o forte
DILI, 13 fevereiru 2023 (TATOLI)— Diresaun Nasional Meteorolójia no Jeofízika (DNMG, sigla portugés), alerta probabilidade boot semana ne’e, kontinua akontese udan hahú hosi intensidade fraku ba forte liu iha territóriu laran liuliu parte foho sira.
Bazeai ba nota komunikadu ne’ebé Agência Tatoli, asesu segunda ne’e, ho previzaun tempu ne’ebé DNMG hasai ba semana ida ne’e nian mak udan akontese hahú hosi loron 13 to’o 17 fevereiru 2023.
Hosi previzaun ne’e, DNMG alerta ba munisípiu sira hanesan, Viqueque, Manatuto (Parte Foho), atensaun espesiál ba munisípiu mak Aileu, Ainaro, Bobonaro, Baucau, Covalima, Lautém, Manufahi inklui Rejiaun Administrativa Espesiál Oé-Cusse Ambeno (RAEOA).
Haree ba previzaun tempu ne’ebé iha husu ba populasaun sira hadook aan nafatin hosi fatin risku sira no buka hela iha fatin ne’ebé seguru. Kazu emerjénsia ruma presiza halo evakuasaun, mantein kalma nafatin, evita pániku no halo tuir orientasaun autoridade lokal ka pesoál protesaun sivil ne’ebé besik.
Tanba poténsia ba udan ho intensidade hosi fraku to’o forte durante semana ne’e nia-laran sei fó risku dezastre hidrometeorolójiku hanesan be’e sa’e, rai halai ka monu, deskarga eletrika no seluk tan prinsipalmente iha rejiaun foho sira. Nune’e husu hotuhotu atensaun ba situasuan sira ne’e.
Jornalista : Arminda Fonseca
Editora : Armandina Moniz
