Edukasaun Baucau identifika estudante bolsa méritu asesu konta bankária foin 25%
DILI, 13 fevereiru 2023 (TATOLI)–Diretór Servisu Edukasaun Munisípiu Baucau, Augusto Ornai Ximenes, hateten edukasaun Baucau identifika estudante mellór klasifikadu iha Baucau hamutuk 1.689 ne’ebé atu asesu prémiu bolsa méritu ne’e, maibé estudante ne’ebé asesu konta bankaria ne’e foin atinje 25%.
Nia hatutan, parte edukasaun relata ona estudante bolsa méritu iha Baucau no submete ona ba nasionál iha semana kotuk, maibé lista estudante ne’ebé mak asesu ona ba konta bankária mak menus liu.
“Ha’u hakarak dehan de’it katak Baucau nian foin estudante hamutuk 25% mak asesu konta bankária hosi totál estudante bolsa méritu na’in 1.689 ne’e,” Augusto Ornai Ximenes ba Agência Tatoli liuhosi telefónika, segunda ne’e.
Estudante sira-ne’ebé asesu ona konta bankária ne’e tanba sira mai sedu iha banku kuaze dadeer madrugada atu bele hetan espasu hodi trata sira-nia konta bankária maibé susar atu asesu.
Maibé, nia dehan, agora iha ona fleksibilidade tanba Ministériu Edukasaun husu ona Banku atu loke tan oportunidade ba estudante sira-ne’ebé agora daudaun kuaze loron ida bele simu ona estudante entre 40 to’o 50 hosi asesu konta bankária.
Ba estudante sira seluk ne’ebé seidauk hetan konta bankária ne’e, tuir nia, tanba sira sei hasoru hela difikuldade ho billete identidade no sertidaun RDTL, tanba ne’e barak mak sei rezolve hela sira-nia dokumentu atu bele hetan konta bankária.
“Ita-nia estudante lubuk ida mak sei trata no sei rezolve hela sira-nia dokumentu sira atu bele hetan konta bankária iha Banku Nasionál Komérsiu Timor-Leste (BNCTL),” nia hateten.
Entretantu, tuir lei Grande Opsaun Planu (GOP) katak orsamentu ne’ebé prevee ona ba programa pagamentu prémiu bolsa méritu ne’e mak la ezekuta tuir durasaun tempu ne’ebé mak termina ona, sei bele fó fila-fali ba kofre Estadu.
Maibé molok fevereiru ne’e ramata estudante 13,517 ne’e tenke hetan ona transferénsia osan ba sira-nia konta bankária. maibé haree ba munisípiu Baucau nian katak estudante foin 25% mak hetan konta bankária ne’e, oinsá MEJD bele halo ezersísiu ida atu aselera prosesu ne’e.
Aleinde ne’e, nia halo klarifikasaun katak tuir lei mós hateten estudante sira hosi eskola paralela la tama iha lista bolsa méritu, tanba sira mai hosi klase eskola sentrál ka eskola filiál ida-nian ne’ebé sira-nia lista hotu tama iha pakote hosi eskola sira-ne’e.
Ne’eduni, nia hateten, iha Baucau kuaze alista eskola paralela hamutuk hitu ne’ebé mai hosi eskola ensinu sekundáriu mak la tama iha bolsa méritu ne’e.
Tuir dadus, estudante melor klasifikadu iha territóriu nasionál ne’ebé atu hetan prémiu bolsa méritu ne’ebé mak MEJD anunsia ona ba públiku ne’e hamutuk 13.517 no sira-ne’e iha obrigasaun atu loke sira-nia konta bankária, nune’e banku bele halo transferénsia osan ba ida-idak ninia konta bankária.
Notísia Relevante:
Jornalista : Tomé Amado
Editór : Cancio Ximenes
