East Timor Trading apoia materiál lojístika ba TATOLI
DILI, 13 fevereiru 2023 (TATOLI) – Empreza Internasionál East Timor Trading – fornesedór servisu líder iha Timor-Leste iha bens konsumu no ospitalidade, oferese materiál lojístika ba Agência TATOLI, Institutu Públiku (TATOLI, I.P), atu bele uza ba nesesidade serbisu.
Materiál sira ne’ebé mak empreza ne’e oferese kompostu husi meza tolu, kadeira hamutuk 12, tenda lima no banner lima.
Iha okaziaun ne’e, Chief Executive Officer (CEO, sigla ingles) East Timor Trading, Samitha Aluwihare, agradese ba proposta hosi TATOLI ba sira atu serbisu hamutuk.
“Obrigadu no agradese ba TATOLI tanba bele haruka ona proposta mai ami. Liuhosi meiu ida hanesan ne’e mak ita bele hametin liután kooperasaun serbisu hamutuk entre ami ho imi”, Samitha dehan ba Agência TATOLI, iha edifísiu East Timor Trading Delta, ohin.
Ezekutivu ne’e dehan, dalabarak liu lee notísia ne’ebé TATOLI – ajénsia informasaun ofisiál Estadu Timor-Leste, publika kona-ba situasaun nasionál no internasionál ne’ebé kredivél no atuál.
“Ha’u sempre lee notísia TATOLI nian, imi sempre halo publikasaun ba ami-nia atividade. Imi mós públika notísia nasionál no internasionál ne’ebé kapas tebes, iha Timor ne’e business internasionál barak, imi husu sira atu apoiu imi mak la konsege imi bele mai ami, ami-nia odamatan nakloke ba TATOLI atu apoiu iha saida de’it mak imi presiza”, responsável másimu Timor Trading ne’e dehan.
Iha oportunidade ne’e, Vise Prezidente hanesan mós Xefe Redasaun Agência TATOLI, Xisto Freitas da Piedade, agradese ba East Timor Trading – Empreza fornesedora ne’ebé fahe ba grupu tolu hanesan venda & distribuisaun, retallu no ospitalidade, ne’ebé laran luak apoia ona materiál lubuk ida ba TATOLI hodi utiliza ba hala’o serbisu.
“Lori TATOLI nia naran agradese ba apoiu hirak ne’ebé mak East Timor Trading fó ona mai ami, ita-nia kooperasaun sei metin nafatin ba oin, TATOLI mós sei loke nia aan nafatin ba ita-boot sira karik iha atividade ruma ami prontu atu mai halo kobertura, ami mai halo kobertura sei publika ba notísia lian haat hanesan, ingles, portugés, Bahasa Indonézia no tetun”, Xisto hakotu.
Jornalista:Hortencio Sanchez
Editór : Zezito Silva
