Timor-Leste no Indónezia asina nota entedimentu ba área indústria no turizmu
DILI, 14 fevereiru 2023 (TATOLI)— Governu Timor-Leste liuhosi Ministériu Turizmu Komérsiu no Indústria (MTKI) ho Ministériu Turizmu Ekonómia Kreativu Indonézia, asina nota entendimentu iha área indústria no turizmu nian.
Bazeai ba nota komunikadu ne’ebé Agência Tatoli asesu tersa ne’e, fo sai katak asinatura nota intendementu ne’e halao iha Palásiu Prezidensiál Bogor-Indonézia (13/02) ne’ebé asina direitamente hosi Ministru Turizmu, Komérsiu no Indústria Timor-Leste, Jose Lucas do Carmo da Silva no Ministru Turizmu Ekonómia Kreativu Indonézia, Sandiaga Solahuddin Uno.
Nota entendimentu iha área indústria ne’e, ko’alia kona-ba oinsá hasa’e kualidade tais Timor. Tanba akordu kooperasaun ne’e hala’o tiha ona entre nasaun rua ne’e iha tinan-2017, maibé tanba pandemia COVID-19 nune’e paradu tiha. Maibé iha tinan 2022 hosi Diresaun Jerál Indústria ho asisténsia ajénsia kooperasaun hosi Japaun konvida péritu hosi Indonézia hodi halo programa diversifikasaun tais ba feto sira iha Timor-Leste.
Nune’e kona-ba kooperasaun iha área turizmu nian ne’e oinsá atu promove no dezenvolve kooperasaun iha área turizmu nian nune’e bele aumenta vizitante turístika nomós dezenvolve rekursu umanu iha instituisaun turizmu nian.
Akordu ida-ne’e mós ko’alia kona-ba atividade marketing turizmu ba promosaun konjunta, divulgasaun informasaun turístika no rezultadu peskiza hodi fahe esperiénsia iha jestaun destinasaun turístika no investimentu iha área turizmu nian.
Iha parte rekursu umanu ho instituisaun turizmu sira-nian, nasaun rua sei analiza no kolekta dadus turizmu, halo estudu komparativu nune’e iha programa treinamentu hodi aumenta esperiénsia no abilidade koñesimentu boa prátika iha área turizmu nian.
Iha nota entendimentu ne’e mós diskuti kona-ba sistema aluga otél no sistema akreditasaun hodi aumenta kualidade atividade ospitalidade.
Enkuantu hosi sorumutu entre Governu rua ne’e, iha nota entendimentu lima mak Governu rua ne’e asina hanesan, estabelesimentu zona ekonómia livre iha fronteira, nota kooperasaun iha área Ensinu Superior, kooperasaun iha área Meteorolójia Klimatolójia no Jeofízika, kooperasaun iha área indústria no nota kooperasaun entre Komisaun Nasional Eleisaun Timor-Leste (CNE-TL,sigla portugés) ho Komisi Pemilihan Umum (KPU) Repúblika Indonézia iha área Informasaun Téknolójia (IT) no formasaun profisional.
Jornalista : Arminda Fonseca
Editora : Armandina Moniz
