Hospital Oé-Cusse rejista pasiente stroke AVC 448 ativa iha terapia 15
OÉ-CUSSE 15 fevereiru 2023 (TATOLI) – Diretora Klínika Hospital Referál Oé-Cusse, Agnes Bana, informa, dezde 2022 to’o janieru 2023 ne’e rejista pasiénte stroke Asidente Vaskulár Cerebrál (AVC) hamutuk 448 no daudaun pasiente ativu hala’o visu terapia iha fasilidade saúde hamutuk na’in-15.
Tuir nia katak, kazu ne’e akontese bainhira sirkulasaun raan iha isin lolon tomak, la’o la normál ka ipertensia maligna, ne’ebé fasil atu da’et ba ho kolesteról aas, diabetes tanba menus ezersísiu, konsumu alkól no fumadór.
Nune’e atu prevene moras stroke ida-ne’e maka presiza implementa menu hahán saudável no seguru, ezersísiu rútina no evita fuma no konsumu alkól.
“Moras ida-ne’e akontese tanba pasiente sofre hela moras ipertensaun, entaun presiza kontrola hemu ai-moruk, dalaruma ita-nia pasiente prefere liu ba ai-moruk tradisionál, entaun ikus mai hetan problema ho kakutak, tanba moras ida-ne’e, nia kauza bainhira ita-nia ran intupidu labele sulin ho di’ak, entaun halo nakfera urat sira-ne’e, mosu hanesan moras stroke,” Agnes Bana, ko’alia ba jornalista sira iha Oé-Cusse, kuarta ne’e.
Nia esplika, iha buat rua, stroke kmaan no todan, tanba stroke todan ne’e hanesan urat sira nakfera akontese pendarahan otak, rezultadu lakon vida, ka bainhira pasiente sira asesu ona fasilidade saúde, profisionál sira fó atende depois ba iha visu terapia.
“Ita iha Hospital Referál Oé-Cusse, iha fasilidade sufisiente atu fó atendimentu ba pasiente ne’ebé sofre moras stroke no mós doutór atu fó atendimentu ba moras stroke,” nia afirma.
Enkuantu kona-bá moras ipertensaun ne’e akontese bainhira sirkulasaun ran ne’e ho valór 130/80 ka liu, kondisaun ne’e perigozu hodi obriga kurasaun atu bomba raan ho maka’as liu ba isin tomak, tanba ne’e hamosu moras perigu sira hanesan, stroke riins no kurasaun.
Tuir nia, ema ho tensaun normál ne’e maka 120/80 mmhg, sa’e entre 120 to’o 129 presaun sistóliku no presaun diástóliku. Ipertensaun grau 1:130/80 mmhg to’o 139/89 mmhg, ipertensaun grau 2:140/90 ka liu.
Nune’e fatór ipertensaun ne’e akontese mai hosi idade avansadu, fatór jénetika hosi família, fumadór, no menus ezersísiu.
Jornalista: Abílio Elo Nini
Editór: Evaristo Soares Martins
