HRO rejista bebé 22 lakon vida tanba tarde ba fasilidade saúde
OÉ-CUSSE 15 fevereiru 2023 (TATOLI) – Durante períodu 2022, Hospital Referál Rejiaun Administrativa Espesiál Oé-Cusse Ambeno (RAEOA), rejista kazu bebé mate hamutuk 22 tanba tarde hakbesik ba fasilidade saúde ne’ebé besik hodi hetan tratamentu.
Diretora Klínika Hospital Referál Oé-Cusse, Agnes Bana, informa, bebé ne’ebé moris iha ospitál referál iha 2022 hamutuk 427, hosi inan ne’ebé mai partu hamutuk 421 tanba balu partu kaduak.
Maibé iha mós bebé 22 lakon sira-nia vida, rejista mai hosi bebé foin moris, bebé moris hosi fulan ida (1) to’o neen (6), tanba moras baixa iha fasilidade saúde maibé la konsege salva vida, no mós balu mate antes partu ka mate kedas iha inan nia kabun.
“Dadus sira-ne’e ita rejista hanesan dadus ba bebé mate, la’ós de’it sira-ne’ebé baixa iha ospitál mak mate, maibé bainhira ami simu, parteira no doutór espesialista halo atendimentu, depois informa katak bebé mate antes partu, entaun iha 2022 ita rejista 22,” Agnes Bana, informa ba jornalista sira iha Hospital Referál Oé-Cusse, kuarta ne’e.
Profisionál saúde ne’e esplika, kauza bebé mate tanba dala barak inan-sira, ladun asesu ba fasilidade saúde, hafoin besik partu ho kondisaun grave maka hakbesik ba iha fasilidade saúde sira.
Alende ne’e mós maske asesu ba iha fasilidade saúde, no konsege simu orientasaun no promosaun hosi parteira no doutór sira, katak, bainhira fila to’o uma sente bebé la book-an iha kabun, presiza lalais ba fasilidade saúde ne’ebé besik hodi hetan atendimentu garantidu hosi profisionál saúde sira.
“Maibé dalaruma tarde, atu hakbesik ba fasilidade saúde ne’ebé besik, karik mai sedu entaun hetan atendimentu di’ak hodi hetan salva, no dalaruma mós liga ho kultura, inan balu prefere liu ba kultura, entaun tarde mai iha fasilidade saúde, maske parteira no doutór sira destaka ona iha postu saúde no sentru saúde sira iha terrtóriu Oé-Cusse,” nia katak.
Maske nune’e parte servisu saúde kontinua halo sensibilizasaun no promosaun ba iha nível suku no aldeia, liuhosi programa kuidadu saúde inan no oan no mós programa nutrisaun fokuliu ba advokasia ba susubeen.
“Ida-ne’e parte saúde nia servisu maka ita iha programa ida ba promosaun no sensibilizasaun iha baze, agora programa bolsa da mãe jerasaun foun mós hala’o daudaun, ba promosaun advokasia la’o nafatin, atu introdús materiá sira liga ho inan isin rua ba ema hotu-hotu atu iha koñesimentu, tanba oan hanesan futuru ba nasaun,” nia katak.
Entretantu, totál sentru saúde iha Oé-Cusse hamutuk haat iha sub-rejiaun Oésilo, Pássabe, Nítibe no Pante Makasar no postu saúde hamutuk 19.
Jornalista: Abílio Elo Nini
Editór: Evaristo Soares Martins
