Janeiru : HNGV hatama reseita ba kofre Estadu ho montante $32.983,06
DILI, 15 fevereiru 2023 (TATIOLI) – Diretór Administrasaun Lojístika no Finansa, Hospitál Nasionál Guido Valadares (HNGV), Raul Humberto Gama, dehan iha janeiru, HNGV hatama reseita ba kofre Estadu ho montante $32.983,06.
“Iha 2023, janeiru nia-laran, HNGV hatama reseita ba kofre Estadu ho montante, $32.983,06, reseita ida ne’e kompostu husi pasiente sira hosi estranjeiru no timoroan”, Raul Humberto Gama, hateten iha nia kna’ar fatin, ohin.
Nia informa, HNGV rekolla reseita ida ne’e husi pasiente sira husi timoroan no estranjeiru nee’bé mak mai iha VIP hodi baixa no mós halo operasaun.
“Ami kolekta husi ema estranjeiru hamutuk $11.423,76, nune’e ba sidadaun timoroan hamutuk, $21.559,30, entaun dadus hirak ne’e HNGV rekolla husi parte check-up no VIP no departamentu seluk tan”, nia afirma.
Reseita hirak ne’e rekolla husi fonte departamentu atestadu médiku, vasina amarella, aluga fatin sentru matan, sentru matan nasionál, pediatria, konoloskopia, bloku operasaun, radiografia, servisu ambulátoriu, maternidade, banku urjénsia, sala VIP, fisioterapia, odentolojia, medisina internál, unidade medikál check-up, NIFAS, konsulta fuan, unidade urjénsia, unidade mortuáriu, hemodialise no acute care.
Jornalista : Felicidade Ximenes
Editór : Zezito Silva
