DILI, 16 fevereiru 2023 (TATOLI)–Diretór Servisu Edukasaun Munisípiu Dili (DSEMD), Carlito Soares, preokupa MEJD seidauk prevee orsamentu ba programa “Eskola iha Uma” liu-liu ba labarik na’in-111 ne’e sei transfere tan ba ensinu báziku iha fulan-marsu no oinsá atu apoiu merenda eskolár ba sira.
“Ha’u preokupa de’it mak ida-ne’e orsamentu apoiu programa merenda eskolár prevee tiha ona ba estudante sira iha territóriu nasionál. Se ita-nia labarik 111 hosi programa Eskola iha Uma ne’e mak transfere tan iha marsu mai ensinu báziku, orsamentu merenda eskolár atu foti hosi ne’ebé hodi apoiu sira na’in-111,” Carlito Soares hateten ba Agência Tatoli iha nia kna’ar fatin, Comoro, kinta ne’e.
Tanba ne’e, nia informa ona asuntu ne’e ba Ministru Edukasaun Juventude no Desportu atu ko’alia ho Ministru Administrasaun Estatál (MAE) tanba programa Merenda eskolár ne’e tutela ba kompeténsia MAE nian.
Ne’eduni, nia husu ba superiór edukasaun atu halo esforsu hodi bele hetan solusaun ruma atu responde tiha preokupasaun edukasaun munisípiu Dili nian ne’e.
“Ha’u tenke hato’o asuntu ida-ne’e ba superiór sira tanba ha’u lakohi mosu buat seluk iha tempu tuir mai atu nune’e labele fó sala malu, tanba ne’e ita tenke hanoin kedan atu labele prejudika programa ME ba labarik na’in-111 ne’e,” nia hateten.
Nia mós preokupasaun tan asuntu kona-ba oinsá labarik 111 atu transfere mai primeiru anu ensinu báziku ne’e ho mekanizmu saida, tanba labarik primeiru ano sira seluk agora daudaun hahú prepara ona atu tuir avaliasaun prezensa iha primeiru períodu ne’e.
“Ha’u konsidera ita iha problema ida tanba labarik hamutuk 111 hosi eskola iha uma mak sei tama ba primeiru anu ensinu báziku hahú fali iha marsu agora. Oinsá mak atu koloka sira iha eskola sira-ne’e, prosesu ensinu aprendizajen ba labarik sira seluk iha primeiru anu ensinu báziku de’it la’o do’ok ona oinsá mak ita atu koloka sira tama iha ne’ebá,” nia dehan.
Ne’eduni, nia dehan, presiza haree lisuk asuntu ida-ne’e atu prepara ona kestaun sira buka halo ezersísiu daudaun ona atu labele prejudika labarik sira ninia prosesu ensinu aprendizajen iha nivél tuir mai.
Tanba, nia dehan, programa “Eskola iha Uma” ninia implementasaun foin mak hahú iha munisípiu Dili.
Programa “Eskola iha Uma” ne’e konsege prodús ona labarik graduadu hamutuk 100 iha faze dahuluk no tuir planu sei iha tan faze daruak ba graduasaun ne’ebé sei realiza iha marsu agora.
Jornalista : Tomé Amado
Editór : Cancio Ximenes
