Estudu viabilidade ba estabelesimentu Sentru Exelente Metinaro konklui ona
DILI, 16 fevereiru 2023 (TATOLI)— Diretór Jerál Sekretáriu Estadu Formasaun Profesionál no Empregu (SEFOPE), Paulo da Silva hateten, estabelesimentu Sentru Exelente iha postu administrativu Metinaro, munisípiu Dili, ninia estudu viabilidade konklui ona.
“Kona-ba estabelesimentu sentru formasaun exelente iha Metinaro nia estudu viabilidade kaer hosi kompañia internasionál Mundi agora remata ona hein sira hatama relatóriu finál mai SEFOPE,” Paulo Alves dehan ba Agência Tatoli, iha Timor Lodge Comoro, Dili, kinta ne’e.
Nia dehan, bainhira relatóriu finál hosi estudu viabilidade ne’e kompañia hatama ona ba SEFOPE prosesu kontinuasaun sei lori ba iha Detallu Enjináriu Dezeñu (DED).
“Ami agora esfosu hela antes mandatu VIII Governu konstituisionál remata ita ezije ba kompañia hatama lalais relatóriu nune’e ita bele lansa ona fatuk dahuluk ba sentru refere. Nune’e, Governu foun mai kontinua de’it,” Paulo hateten.
Vantajen hosi sentru exelente ne’e rasik nia benefísiu ba joven timor-oan. Tanba sentru ne’e bainhira harii bazeia ba rezultadu hosi estudu viabilidade provizóriu ne’ebé kompañia aprezenta ne’e sei akumula ema 5.000 to’o 8.000 mak bele partisipa formasaun.
Tanba Sentru Formasaun Senai Becora no Tibar la natoon, ema mai rejistu barak maibé infelizmente ema oituan mak partisipa formasaun tanba fatin kloot. Nune’e, Governu iha hanoin loke tan Sentru Formasaun Exelente ne’e nu’udar sentru ne’ebé exelente iha Pasífiku no Ázia Sudéstiku hodi bele fasilita timor-oan sira no númeru barak liu atu bele tuir formasaun iha sentru ne’e rasik.
“Ne’ebé ita hein de’it rezulatdu hosi viabilidade ne’e mak hakat ba oin, tanba iha terrenu ne’e mós iha parsela privadu hamutuk 22 inklui eskola públiku ida, entaun ida ne’e tenke muda sai atu mak halo konstrusaun ba sentru refere,” Paulo dehan.
Orsamentu ba estudu viabilidade sentru exelente rasik hamutuk $230.000. Maibé, orsamentu refere SEFOPE laiha, ho nune’e liuhosi Konsellu Administrativa Fundu Instraestrutura (KAFI) mak fasilita no konkursu públiku liuhosi Komisaun Nasional Aprovizionamentu (CNA,sigla ), no SEFOPE hatene deit mak kompañia manán na’in.
Jornalista : Arminda Fonseca
Editora : Armandina Moniz
