Top

SLB empresta jogadór Mouzinho hosi Visakha FC durante fulan rua

Mouzinho de Lima. Imajen/Espesiál

DILI, 16 fevereiru 2023 (TATOLI) – Klube primeira divizaun AD. SLB Laulara halo ona akordu ho klube primeira divizaun Kamboja Visakha FC hodi fó empresta jogadór Mouzinho de Lima atu haforsa SLB durante fulan rua iha Liga Futeból Timor-Leste (LFTL).

SLB tenke halo akordu ho Visakha tanba iha fulan kotuk jogadór Mouzinho selebra ona kontratu ho Visakha durante tinan ida, hahú janeiru-dezembru tinan ne’e.

“Los, SLB empresta ha’u hosi Visakha durante fulan rua, hahú agora to’o 30 abríl, ha’u tenke fila ona ba Kamboja”, dehan Mouzinho ba Agência TATOLI via media social WhatsApp, ohin.

Nia esplika, liga Kamboja nian sei hala’o iha fulan agostu ho nune’e fulan maiu tenke junta hamutuk ona ho ekipa hodi halo preparasaun.

Jogadór selesaun nasionál ne’e afirma, sei hatudu jogu ne’ebé di’ak ho SLB atu nune’e bele fó vitória ba ekipa durante fulan rua.

“Joga iha SLB, ha’u sei esforsu hamutuk ho kolega sira atu fó vitória ba SLB hanesan ha’u nia klube antigu, hosi nia mak ohin loron ha’u ba joga iha liur, entaun époka ne’e ha’u hanesan jogadór ne’ebé empresta ha’u tenke halo buat ruma ba klube ne’e”, Mouzinho konklui.

Jornalista:Hortencio Sanchez

Editór : Zezito Silva

Publisidade

Leave a Reply

Latest Post

error: Content is protected !!