Tempu badak Governu sei konstrui postu seguransa iha Ramelau
DILI, 17 fevereiru 2023 (TATOLI)— Governu liuhosi Ministériu Turizmu Komérsiu no Indústria (MTKI), iha ona planu tempu badak sei harii postu seguransa ida no hariis-fatin públiku rua ka tolu iha Ramelau.
“Iha tempu badak ita sei konstrui uma seguransa ida no hariis-fatin públiku rua ka tolu iha Ramelau hodi fasilita vizitante sira ba vizita fatin refere,” Diretór Jerál Turizmu, Jelino Soares hateten ba Agência Tatoli, iha nia-knaar fatin Farol, Dili, sesta ne’e.
Nia dehan, planu Governu atu harii uma seguransa no hariis-fatin públiku iha Ramelau ne’e, sei harii iha tinan ida ne’e. Tanba, daudaun ne’e buat hotu submete ba Konsellu Nasional Aprovizionamentu (CNA, Sigla portugés) no iha tempu badak sei loke konkursu públiku ba kompañia manán na’in sira ho nia montante orsamentu hamutuk $100.000.
Jelino hateten, objetivu Governu atu konstrui postu seguransa no hariis-fatin públiku sira ne’e, oinsá atu fasilita vizitante sira ba Ramelau, liuliu postu seguransa tenke iha. Nune’e, vizitante sira tenke rejistu naran nune’e buat ruma seguransa bele hatene.
“Ita tenke tau eskritóriu nune’e vizitante ruma ba bele rejistu atu buat ruma akontese ba vizitante sira seguransa bele hatene.
Nia dehan, seguransa ne’ebé Governu tau iha ne’ebá hamutuk na’in 11 hodi haree ba fasilidade sira ne’ebé iha maibé to’o iha ema barak problema ne’e la rezolve tanba ema ba balun iha intensaun hakarak ba maibé balun ba hakarak tanba rame.
Maibé MTKI mós halo kooperasaun ho Ministériu Agrikultura no Peska (MAP) liuhosu Diresaun Jerál Floresta hodi tau ema mós guarda floresta sira.
“Antes ne’e ita hamutuk ho Asosiasaun Turizmu Ramelau Blehetu Kablaki (ASTRABEKA) monta sinál no lixu fatin sira. Sinais sira ne’e monta hahú hosi santuáriu to’o Ramelau tutun. Maibé sinál sira ne’e laiha hotu tanba ema sira ne’ebé ba vizita ne’e balun laiha konsiénsia ba estraga sinál sira ne’e hotu,” nia dehan.
Nune’e nia husu ba públiku atu ba Ramelau tenke preparadu tanba fatin iha ne’ebá lulik, no luan la’os kiik.
“Ita-nia rekomendasaun ba públiku mak ba Ramelau tenke prepara an, no tenke koopera ho seguransa sira iha ne’ebá tanba fatin Ramelau ne’e, la’o ain nian barak ne’ebé tenke ba labele naran la’o tanba ita tau sinál maibé hetan estraga hotu ona,” nia dehan.
Jornalista : Arminda Fonseca
Editora : Armandina Moniz
