DILI, 20 fevereiru 2023 (TATOLI) – Treinadór klube primeira divizaun Liga Futeból Timor-Leste (LFTL) Emanuel FC Emiliano da Silva, dehan maske klube ne’e ho jogadór lokál maibé prontu atu kompete ho klube jigante Assalam FC ne’ebé mai ho jogadór estranjeiru na’in haat ba leten.
“Ami preparadu atu tuir kompetisaun ne’e, iha ami-nia jogu primeiru hasoru kedan Assalam ne’ebé ita bele dehan klube jigante ho jogadór mesak kualidade de’it, sira mós iha jogadór internasionál barak, maibé ami ho de’it jogadór lokál prontu atu kompete ho sira, ami-nia mehi mak tenke save pontu tolu”, treinadór dehan ba jornalista sira iha Estádiu Munisipál Dili, ohin.
Nia revela, alvu Emanuel FC nian mak mantein nafatin iha primeira divizaun, ambisaun ba kampiaun mak seidauk iha tanba foin mak promove ba primeira divizaun iha tinan 2021 liubá.
“Ami sei joga oinsá mak mantein nafatin iha primeira divizaun, labele tun fali ba segunda divizaun, ami laiha ambisaun atu sai kampiaun, kapasidade ne’ebé iha mak tenke mantein nafatin iha primeira divizaun”, nia refere.
Iha oportunidade hanesan, treinadór Assalam FC Gaspar Amaral, preokupa katak maske preparative sira mínimu maibé Assalam FC sei hatudu jogu brillante hodi gaña pontu tolu iha jogu primeiru.
“Preparasaun ami nian mínimu tebes, maibé ami nafatin esforsu makas, ha’u konfia jogadór sira iha jogu ne’e sei hatudu jogu ne’ebé di’ak no ami sei manán iha jogu primeiru”, eis treinadór Lalenok United FC subliña.
Tuir oráriu ne’ebé iha, klube rua ne’e sei hasoru malu aban loraik tuku 16:00 to’o remata, iha Estádiu Munisipál Dili.
Jornalista:Hortencio Sanchez
Editór : Zezito Silva
