Munisípiu hitu atinje ona imunizasaun ba labarik tinan lima mai kraik
DILI, 20 fevereiru 2023(TATOLI) – Diretór Nasionál Saúde na Família iha Ministériu Saúde, Vitór Martins, dehan Munisípiu Bobonaro, Aileu, Ermera, Covalima, Viqueque, Manatutu no Rejiaun Adminsitrativu Oe-cusse Ambeno (RAEOA) atinje ona alvu vasina imunizasaun ba labarik tinan lima mai kraik iha teritóriu nasionál.
“Durante ita halo lansamentu ba vasina imunizasaun iha loron 12 janeiru iha teritóriu nasionál ba labarik tinan lima mai kraik, entaun ita nia tarjetu ne’e hakarak atinje 95%, maibé to’o loron 17 fevereiru, munisípiu hitu mak foin atinje 100%”, Vitór Martins, informa iha JL VILLA, ohin.
Nia dehan, munisípiu sira ne’ebé mak seidauk atinje 95%, MS esforsu nafatin tama sai hodi aviza atu inan no aman sira bele lori labarik ba sira simu vasina imunizasaun ba sarampu rubella, PCV, OPV, Vitamina A no Albendazole iha postu vasina ne’ebé mak estabelese ona.
Nia rekorda, labarik sira ne’ebé atu simu aimoruk kontra lumbringa ka albendazole ho alvu ne’ebé iha katak labarik hamutuk 183,563, husi númeru ne’e labarik ne’ebé simu ona aimoruk lumbringa hamutuk 114,602 ka 82,7% no labarik ne’ebé seidauk simu aimoruk lumbringa hamutuk 23,961.
“Vasina OPV ba labarik sira hamutuk 168,263, husi ne’e labarik ne’ebé simu ona vasina hamutuk 143,749 ka 85,4% no labarik ne’ebé seidauk simu hamutuk 21,642”, nia afirma.
Vasina sarampo no rubella ne’ebé MS ba labarik sira iha teritóriu nasionál hamutuk 146,621 husi ne’e labarik ne’ebé simu ona vasina hamutuk 120,577 ka 82,2% no labarik ne’ebé seidauk simu hamutuk 26,047.
“Vitamina A, destinadu ba labarik sira hamutuk 152.958, husi ne’e labarik ne’ebé mak simu ona hamutuk 126,559 ka 82,7% no labarik sira ne’ebé mak seidauk simu hamutuk 26,399’, nia esplika.
Vasina PCV ne’ebé MS destina ba labarik sira hamutuk 163,027, husi ne’e labarik ne’ebé simu ona vasina hamtutuk 139,003 ka 85,3% no labarik ne’ebé mak seidauk simu vasina hamutuk 24,024.
Entertantu, husi loron 12 janeiru to’o 17 fevereiru, labarik ne’ebé mak hetan reasaun adversu hamutuk na’in neen, husi ne’e Munisípiu Baucau na’in-rua, Dili rua no RAEOA rua.
Jornalista : Felicidade Ximenes
Editór : Zezito Silva
