Reabilitasaun eskola EBC Bidau Akadiruhun paradu
DILI, 20 fevereiru 2023 (TATOLI)–Prosesu reabilitasaun edifísiu ida ho sala aula rua inklui eskritóriu no hariis fatin ida iha eskola Ensinu Báziku Central (EBC) Bidau Akadiruhun paradu durante fulan lima nia laran bainhira levantamentu pedidu orsamentu ba 75% atraza.
Notísia Relevante: Reabilitasaun sala tolu iha EBC Bidau Akadiruhun atinje ona 20%
Prezidente Projetu Komunitária eskola Bidau Akadiruhun, Mateus Pinto Tilman, hateten prosesu reabilitasaun ba edifísiu eskola ne’e la’o di’ak hela problema mak pedidu levantamentu osan ba faze datoluk ne’e mak atraza tiha, entaun prosesu reabilitasaun ne’e paradu tiha durante fulan lima nia laran.
“Ami deskansa kedan durante fulan lima nia laran hahú hosi agostu 2022 to’o janeiru 2023. Ami foin hahú fali reabilitasaun ne’e iha semana kotuk. Se lae, eskola EBC Bidau Akadiruhun ne’e hotu tiha ona,” Mateus Pinto Tilman hateten ba Agência Tatoli iha eskola EBC Bidau-Akadiruhun, segunda ne’e.
Eis Diretór EBC Bidau Akadiru-hun ne’e haktuir, konstrusaun ne’e paradu iha faze daruak 50% nian bainhira sira hatama pedidu levantamentu ba pagamentu faze datoluk 75% ne’e mak osan la sai.
Maibé, nia dehan, agora pagamentu ba faze datoluk nian la’o ona entaun bele garante ona katak prosesu reabilitasaun ba sala-de-aula, eskritóriu diretór inklui hariis fatin ida sei ramata iha fulan ida nian laran.
“Orsamentu ne’ebé ami simu ona hosi 75% ne’e hamutuk $60.000-resin hodi hala’o tan reabilitasaun ba sala-de-aula rua, eskritóriu no hariis fatin ida. Ami garante la to’o fulan ida ami bele entrega ona edifísiu ne’e ba Governu hodi halo preparasaun ba inaugurasaun,” nia dehan.
Tuir nia, prosesu reabilitasaun ba faze datoluk 75% ne’e falta nahe keramik, taka plafon no pintura de’it, entaun material hotu kompletu hotu ona no agora badaen sira kontinua hala’o ona servisu, tanba tenke aselera projetu ne’e atu bele fasilita lalais estudante sira iha prosesu aprendizajen.
Mateus Tilman informa liután, eskola EBC Bidau Akadiruhun ne’ebé hetan apoiu reabilitasaun ne’e ba edifísiu rua, sala-de-aula lima inklui eskritóriu ida no hariis fatin ida, maibé edifísiu ida ho sala-de-aula tolu ramata ona no agora hela de’it edifísiu ida ho sala-de-aula rua, hariis fatin no eskritóriu de’it mak iha prosesu nia laran,.
Jornalista : Tomé Amado
Editór : Cancio Ximenes
