DILI, 21 fevereiru 2023 (TATOLI) – Prezidente Tribunál Rekursu (PTR), Deolindo dos Santos, hateten prosesu konstrusaun edifísiu Tribunál Distritál Dili, empreza konstrutór sei finaliza iha fulan maiu tinan ne’e.
“Prosesu konstrusaun ba difísiu Tribunál Primeiru Instánsia Munisípiu Dili, agora daudaun sei lao hela, ita-nia previzaun, obra ne’e sei remata iha fulan maiu, la liu tinan ida ne’e”, Deolindo dos Santos hateten ba jornalista sira iha kna’ar fatin Caicoli, tersa ne’e.
Deolindo koalia ona ho kompañia ne’ebé kaer obra ne’e atu aselera konstrusaun obra ne’e hodi nune’e obra ne’e bele termina tuir data ne’ebé mak iha.
“Sira submete ona proposta ba Ajénsia Dezenvolvimentu Nasionál (ADN, sigla portugés) atu estende tán obra konstrusaun Tribunál Distritál Dili ba tempu ne’ebé naruk, maibé ha’u la aseita. Ha’u dehan katak Estadu Timór sei lakon sé bainhira imi hakarak dada bebeik obra ne’e ba tempu naruk”, nia dehan.
Nia hateten, Tribunál Rekursu firme ho desizaun katak kompañia ne’ebé kaer obra edifísiu Tribunál Distritál Dili tenke finaliza obra ne’e tuir previzaun fulan ne’ebé mak iha.
“Ha’u koalia ba sira (kompñia) labele labele dada naruk projetu ne’e”, Deolindo dehan.
nia rekorda katak tanba tuir kontratu ne’ebé kompañia selebra ho Governu ba konstrusaun edifísiu Tribunál Distritál Dili sei finaliza iha fulan outubru tinan kotuk. Maibé iha prosesu ne’e la konsege tanba ho razaun kompañia ne’e hetan difikuldade tanba kauza hosi situasaun Covid-19, nune’e atrazu ba importasaun sasan konstrusaun tarde.
“Entaun nudar donu ba projetu Tribunál entende ida ne’e hodi halo estensaun ba obra ne’e to’o fevereiru tinan ida ne’e no agora kompañia husu atu estende tán obra ne’e ba tinan ne’e maibé ha’u la aseita”, Deolindo afirma.
Nia hateten, kompañia husu estende tan obra ne’e tanba kompañia rasik hetan difikuldade iha prosesu balun liuliu ba sasan kontrusaun nian ne’ebé presiza aumenta tán buat balun no kontrolu ne’ebé rigór hosi ekipa verifikasaun no fiskalizaun hosi Tribunal Rekursu ba obra ne’e rasik.
“Hanesan donu ba projetu ne’e, ita halo kontrolu ida ne’ebé rigorozu, buat hotuhotu tenke bazea ba verifikasaun no ekipa fiskalizaun ne’ebé ha’u forma ne’e, tanba ne’e halo kompañia ne’ebé kaer projetu ne’e halo obra lao lentu oituan”, Deolindo afirma.
Tanba buat hotu tenke liuhosi fiskalizaun no verifikasaun hosi Tribunál Rekursu depois mak ekipa relata ba iha ADN, KAFI nune’e mak mai fali iha Tribunál foin halo pagamentu ba kompañia.
“Kuandu ekipa ne’ebé ha’u forma ne’e relata relatóriu mai ha’u, ami haree los ona mak foin ha’u halo despaixu foin halo pagamentu ba kompañia”, Deolindo salienta.
Tanba ne’e, empreza ne’e sente difikulta oituan ba projetu ne’e, tanba hetan kontrolu rigór husi donu projetu Tribunál Rekursu rasik.
“Ita tenke halo kontrolu rigór, nune’e projetu ne’e ho kualidade tanba konstrusaun edifísiu ne’e halo ho osan bo’ot, Milliaun $10-resin, ezatamente ita tenke halo konstrusaun ne’ebé di’ak atu projetu ne’e iha nia kualidade”, nia esplika.
Jornalista: Natalino Costa
Editór : Zezito Silva
