DILI, 23 fevereiru 2023 (TATOLI) – Autoridade Protesaun Sivíl (APC, sigla portugés) sei sei halo teste ba sistema alerta sedu (sirene) iha aban, sesta (24/2) tuku 15:00.
“Aban loraik ita sei halo teste fali ba sistema alerta sedu ba rai nakdoko no tsunami tanba ne’e husu ba ita komunidade atu labele pániku durante halo teste”, Diretór Relasaun Externa no Komunikasaun, Anacleto Caetano hateten ba jornalista sira iha nia kna’ar fatin Cacoli, kinta ne’e.
Nia dehan. sirene ka sistema alerta sedu, nia lian makas, la’os rona de’it iha Dili laran maibé bele to’o iha Dare, tanba ne’e husu ba populasaun iha kapitál atu labele pániku.
“Sistema alerta sedu, ita monta ho objetivu atu fó alarma bainhira mosu rai nakdoko no mosu tsumani, durante ne’e mosu rai nakdoko, ita nia sistema la fó alarma tanba la funsiona, maibé agora empreza halo ona manutesaun no aban ita halo teste fila fali ona”, nia afirma.
Sistema alerta sedu hetan apoiu hosi komuidade Asia Pasífiku iha 2015. Sistema ne’e SPC monta ona iha fatin rua, mak Aeroportu Internasionál Nicolau Lobato no Largo Lecidere, maske nune’e, sistema ne’e la funsiona dezde 2020 maibé autoriedade kontrata fali empreza ARFAT hodi halo manutensaun.
Notísia relevante : Governu Lansa Sistema Alerta Tsunami
Jornalista: Natalino Costa
Editór : Zezito Silva
