DNMG : atensaun ba munisípiu tolu sei akontese udan intensidade fraku-forte
DILI, 23 fevereiru 2023 (TATOLI)—Ministériu Transporte no Komunikasaun (MTK) liuhosi Diresaun Nasionál Meteorolójia no Jeofíziku (DNMG, sigla portugés), fó sai previzasaun tempu hahú semana ne’e to’o semana oin sei akontese udan hosi intensidade fraku ba forte iha parte foho sira.
Bazeia ba nota komunikadu ne’ebé Agência Tatoli asesu, kinta ne’e mak previzasaun tempu ba akontese udan ne’e rasik hahú hosi, 23 fevereiru to’o 03 marsu 2023.
Hosi akontesimentu udan intesidade fraku ba forte ne’e rasik, sei akontese territóriu hotu maibé atensaun espesiál mak ba munisípiu tolu, Bobonaro, Ermera, Manatuto inklui Rejiaun Administrativa Espesiál Oé-Cusse Ambeno (RAEOA).
Kona-ba atensaun espesiál ba anin mak kosta norte no atensaun ba laloran mak tasi rasik ne’e ba kosta norte no súl.
Velocidade anin sei varia hosi normal to’o maka’as liu 10-40 km/h akompaña ho rajada anin fuik ho nia intensidade boot liu 40 km/h iha rejiaun kosteiraka tasi ibun sira entre hosi loron 24 to’o 28 fevereiru.
Intensifikasaun anin refere sei influénsia mós tasi aas iha kosta norte inklui RAEOA, laloran tasi nia aas iha tendénsia boot liu 1.2 metru.
Nafatin apela ba públiku bainhira akontese anin booot husu ba populasaun sira hadook aan nafatin hosi fatin risku sira no buka fatin ne’ebé seguru.
Jornalista : Arminda Fonseca
Editora : Armandina Moniz
