MNEK hala’o vizita traballu ba nasaun tolu
DILI, 23 fevereiru 2023 (TATOLI) – Ministra Negósiu Estranjeiru no Kooperasaun (MNEK) Adaljiza Albertina Xavier Reis Magno, halao vizita traballu ba nasaun Jenebra, Singapura no Doha Qatar hodi partisipa iha reuniaun nível altu.
“MNEK nia vizita traballu ba nasaun tolu, atu partisipa iha segmentu nível altu hosi sesaun Konsellu Direitu Umanu ba dá-la 52, iha Jenebra, vizita traballu ba Singapura no viajen mós ba Doha Qatar hodi partisipa iha konferénsia dalimak país sira menus dezenvolvidu (LDC5, siglá-inglés)”, katak iha komunikadu ne’ebé Agência TATOLI asesu hosi media MNEK, ohin.
Iha Jenebra, Ministra Magno sei partisipa iha segmentu nível altu hosi sesaun regulár Konsellu Direitu Umanu ba dá-la 52, ne’ebé sei hala’o iha loron 25-28 fevereiru no sei hato’o nia intervensaun kona-ba Timor-Leste nia pozisaun relasiona ho promosaun no protesaun ba direitu umanu nian iha nivél nasionál no mós internasionál.
Aleinde ne’e, Adaljiza sei hasoru malu ho nia omólogu hodi ko’alia asuntu multilaterál nian no hola parte mós iha reuniaun CPLP ho Komisáriu Nivél Altu ba Konsellu Direitu Umanu.
Hafoin konklui vizita iha Jenebra, Ministra Magno sei hala’o vizita traballu ba Singapura iha loron 1 to’o 3 fulan marsu hodi partisipa iha eventu Fundasaun Ázia-Nova Zelándia nian.
Durante vizita, ministra ne’e sei hala’o enkontru bilaterál ho nia omólogu hosi Nova Zelándia no sei kontinua ho asina deklarasaun konjunta kona-ba parseria entre Timor-Leste ho Nova Zelándia.
Ministra Magno sei dezloka hosi Singapura ba Qatar, hodi partisipa iha konferénsia dalimak país sira menus dezenvolvidu (LDC5, siglá-inglés), ne’ebé sei hala’o iha loron 5-9 marsu 2023, iha Doha Qatar no sei partisipa mós iha komemorasaun aniversáriu kategória nasaun sira ne’ebé menus dezenvolvidu ba dá-la 50.
Iha vizita traballu hirak ne’e, Ministra Magno, akompaña hosi Licínio Branco, Diretór-Jerál ba Asuntu Multilaterál no Rejionál, Crisogno de Araújo, Diretór-Jerál ba Asuntu Bilaterál, Natalia Sarmento, Xefe Gabinete no Membru delegasaun sira seluk.
Delegasaun aranka ona hosi Díli iha loron 22 fevereiru no sei fila hikas mai Timor-Leste iha loron 12 marsu 2023.
Jornalista:Hortencio Sacehez
Editór : Zezito Silva
