Governu lansa kompetisaun negósiu inovativu iha área indústria karpintaria

Liquiça, 24 fevereiru 2023 (TATOLI)—Governu liuhosi Ministériu Koordenadór Asuntu Ekonómiku (MKAE) no Ministériu Turizmu Komérsiu no Indústria (MTKI) hamutuk Sentru Nasional Empregu no Formasaun Professional Tibar (CNEFP) halo lansamentu kompetisaun negósiu inovativu iha área indústria karpintaria.

Ministru Asuntu Koordenadór Ekonómiku, Joaquim do Amaral, hateten, kompetisaun iha área indústria karpintaria ne’e importante tanba tulun no fó dalan ba sidadaun sira bele sai empreza iha sira-nia atividade ekonómiku ne’e rasik.

“Hanesan ita hatene atividade sira ne’e, importante tebes fó fatin ba timor-oan sira bele halo sira-nia atividade ekonómiku atu nune’e bele prepara an haksumik hamutuk ho Governu dudu lalais ita-nia dezenvolvimentu iha railaran liuliu dezenvolvimentu iha setór ekonómia,” Joaquim do Amaral, hateten, iha CNEFP, Tibar, sesta ne’e.

Nia dehan, atu prepara empregu tenke liuhosi formasaun profesionál. Formasaun ne’e iha dalan barak hanesan formasaun formal balu mak eziste daudaun iha sentru formasaun sira no formasaun balu mak atividade hanesan daudaun liuhosi kompetisaun sira ne’e.

Nia dehan, kompetisaun sira ne’e, bele konsidera hanesan formasaun oportunidade ida ba timor-oan sira ne’ebé iha talenta atu bele partisipa hodi hatudu sira-nia matenek talenta nune’e sira bele benefísia hosi oportunidade eventu sira ne’ebé iha.

Membru Governu ne’e dehan, oportunidade lansa kompetisaun negósiu inovativu, hodi halo kompetisaun ida ne’e para fó oportunidade ba joven sira atu partisipa. Tanba, bainhira sira manán sei hetan apoiu oituan hosi Governu atu haboot tan sira-nia negósiu.

“Tema ne’ebé ohin ita hili mak ‘Haforsa Indústria ho Ideia Inovativu’. Tema ida ne’e konsentra iha karpintaria nian no mobiliáriu ne’e nomos tenke sai hanesan indústria ida. Atu sai hanesan indústria ida, ita-nia produtu ne’e tenke koresponde ba merkadu nia ezijénsia. Ita labele halo kadeira tuir ita-nia hakarak maibé tenke halo tuir merkadu nia hakarak. Tenke aprende buat barak atu dezenvolve ita-nia negósiu tanba ne’e ita tau negósiu inovativu ne’e,” Joaquim hateten.

Iha fatin hanesan, Vise Ministru Komérsiu no Indústria, Domingos Lopes Antunes, hateten kompetisaun negósiu inovativu ba indústria karpintaria ne’e importante tebes tanba  ne’e husu ba foin sa’e sira aproveita didi’ak oportunidade ne’e tanba daudaun iha Dili laran estrada ibun sira ne’e, haree karpintári ne’e ema  hosi estranjeiru mak domina.

“Ha’u husu ita boot sira tenke aproveita didi’ak oportunidade ne’e tuir formasaun hatudu katak ita mós bele. Tanba karpintaria mobiliáriu ne’e merkadu boot tebes. Nune’e Governu halo kooperasaun ho CNEFP hodi halo lansamentu ne’e tanba ita iha ai-barak,” nia hateten.

Diretór Ezekutivu CNEFP Tibar, Simão Tito Barreto, hateten, atividade kompetisaun negósiu inovativu indústria karpintaria ne’e hala’o tanba CNEFP halo parseria ho MTKI.

“Ohin ita lansa programa ida liuliu ba ita-nia indústria karpintaria sira iha railaran no individual ne’ebé iha ideia inovativu hamosu produtivu sira ne’ebé atraitivu konsumidór sira, liuliu ita haree ita-nia ekipamentu sira iha edifísiu servisu, negósiu fatin sira inklui eskola sira ita haree sei falta mobiliáriu sira, maske ita iha poténsia ai-teka, ai-na no ai sira seluk tan,” nia dehan.

Nia dehan, atu hetan produtu ne’ebé kualidade ho modelu ne’ebé atrai ema ne’ebé hakarak atu uza presiza fó biban ruma indústria ne’e mai partisipa hodi promove sira-nia kriativu sira ne’e, no kualidade produtivu sira.

Kompetisaun refere konvida grupu karpintaria sira hosi munisípiu hotu nomos konvida sira aprezenta ideia kriativu ne’e mai iha kompetisaun ne’e. Kompetisaun negósiu inovativu indústria karpintária ne’e rasik foku atu implementa kapasidade tékniku no fó apoiu ekipamentu iha parte akabamentu “finishing” ba Mikru Pekena no média empreza.

Kompetisaun ne’e, aplikante sira atu aplika hahú loron 27 fevereiru to’o 20 marsu. Avaliasaun ba aplikasaun fó sai naran iha loron 25 abril, workshop finishing iha loron 02 to’o 06 maiu no bootcamp ‘planu negósiu’ iha loron 08 maiu to’o 11 maiu no  ikus ka  pitching award ceremony ne’e iha loron 12 maiu 2023.

“Rezultadu ikus partisipante sira atu hetan prémiu ne’e hahú hosi ema na’in 10 to’o 30. Prémiu sira ne’ebe sei hetan sei reforsa sira-nia produtu no osan,” nia dehan. 

Jornalista : Arminda Fonseca

Editora     : Armandina Moniz