Top

Kombate korrupsaun presiza luta koletiva

DILI, 24 fevereiru 2023 (TATOLI) – Komisáriu Komisaun Anti-Korrupsaun ( CAC, sigla portugés), Sergio Hornai, hateten atu kombate korrupsaun ne’e presiza ema hotu nia tulun.

“Atu kombate korrupsaun ne’e ita hakarak asaun koletiva ida, ita hakarak movimentu nasionál ida ba kombate korrupsaun iha Timor-Leste’’, Sergio Hornai dehan iha nia intervensaun iha serimónia ezisténsia CAC ba dala 13 ne’ebé mak hala’o iha salaun Komisaun Nasionál Eleisaun (CNE, sigla portugés), Colmera, sesta ne’e.

Komisáriu CAC ne’e esplika, kombate korrpsaun kuandu ema hotu la konstribui atu prevene aktus ida ne’e mak bele prejudika no fó prejuizu ba dezenvolvimentu nasaun.

Nia subliña, tuir relatóriu transparénsia internasionál klasifika Timor-Leste nu’udar nasaun iha nia rankin di’ak iha kombate korrupsaun nian.

“Nasaun 99 nia avalisaun ba ita nian kombate korrupsaun ita iha ranking ne’ebé di’ak iha kombate korrupsaun iha nivél korrupsaun, ita hakarak ita okupa liután klafifikasaun di’ak atu atinje ida ne’e presiza ema hotu nia konstribui hodi ita kombate di’ak liu koorupsaun ita Timor-Leste”, nia revela.

Iha fatin hanesan, Ministériu Justisa Tiago, hato’o parabéns ba ekipa CAC nian tanba ho sira nia servisu durante tinan 13 ho menutu ida ne’e, CAC sei eziste hodi hala’o knaar, hahú husi inísiu to’o ohin loron.

“Ita hotu hatene katak Timor-Leste asume tiha ona kompromísu polítiku halakon krime korrupsaun nian, Governu ida ne’e halo esforsu hotu atu halakon krime refere tanba ne’e sériu no todan, korupsaun ne’e perigozu ida ne’ebé bele harahun, valór mentál moris iha sosiedade no korrupsaun mós bele harahun aliserse Estadu Direitu Demokrátika ninian”, nia dehan.

Governante ne’e hateten, haree ba ameasa bo’ot husi korrupsaun mak Estadu liuhosi VIII Governu konstitusionál kontinua investe no haforsa nafatin institutuisaun Estadu sira ne’ebé servisu ba kombate korrupsaun nian, hanesan Tribunál Rekursu, CAC, Ministériu Públiku no mós instituisaun relevante sira seluk.

“Korrupsaun no atu halo prevensaun mak Governu mós estabele ona Komisaun Nasionál Kombate Krime brankamentu Kapitál, ne’ebé atan ha’u rasik Ministru Justisa, Tiago Sarmento rasik mak lidera hamutuk ho Ministériu Negósiu Estranjeiru no Kooperasaun”, nia haktuir.

Krime korrupsaun no brankeamentu kapitál dala barak la ka’it ba malu tanba ne’e Governu iha obrigasaun atu foti medida hotu, hodi prevene no kombate. Lei medida prevensaun no kombate korrupsaun, hatuur ona prinsípiu no medida atu prevene no kombate korrupsaun, dala hira mak prevensaun ne’e maka deklarasaun rendimentu rikusoin no interese sira,

“Espera ita hotu ne’ebé iha salaun ida ne’e, hahú husi leten to’o kraik tenke kumpre dever ida ne’e”, ministru dehan.

Nune’e mós, reprezentante Prezidente Tribunál Rekursu Juiza Konselleira, Maria Natencia Gusmão Pereira, hateten ho ezisténsia CAC tama ona idade ida ne’ebé bolu naran adolesente.

“Iha idade ida ne’e, saida mak ita halo ona, hanesan ohin komisáriu dehan, CAC iha ne’ebé ona no atu ba ne’ebé, nune’e husu ba ita hotu-hotu nia responsabilidade”, nia dehan.

Maria Natercia konsidera CAC halo ona buat barak maibé iha buat barak mós sei iha falla maske ki’ik maibé ida ne’e laiha buat tanba durante ne’e CAC atinje buat barak no espera iha futuru di’ak liután.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!