DILI, 24 fevereiru 2023 (TATOLI) – Ministru Asuntu Parlamentár no Komunikasaun Sosiál (MAPKOMS), Francisco Jerónimo, asina kontratu ho Empreza PT. Global Citra Utama hosi Indonézia hodi instala tore tolu iha Munisípiu Ainaro, Bobonaru no Lautem durante fulan neen.
“Ita iha tore neen, maibé asina kontratu ida ohin ne’e ba projetu instalasaun tore tolu ne’ebé hahú uluk iha Lospalos, Bobonaro no Ainaro”, Francisco Jerónimo ba jornalista sira hafoin serimónia kontratu ho empreza iha Palásiu Governu, sesta ne’e.
Instalasaun tore sei hahú iha marsu, tanba MAPKOMS sei fó tempu ba empreza atu haree sira-nia preparasaun téknika liuliu transporta materiál sira ba fatin instalasaun nian.
Francisco Jerónimo sita, orsamentu ba projetu instalasaun tore, MAPKOMS selebra ho empreza hamutuk millaun ida-resin.
Nia hatutan, projetu instalasaun tore sei halo lansamentu ba fatuk dahuluk iha Munisipiu Laútem no sei lansa hosi Primeiru-Ministru Taur Matan Ruak.
MAPKOMS espera ho instalasaun tore sei aumenta kapasidade sistema televizaun dijitál RTTL, Ep liuliu ba transmisaun multimédia terrestre.
“Ha’u hanoin tore tolu ne’ebé mak ita instala ne’e ha’u hanoin sira sei bele halo kobertura ba nível munisipál sira seluk karik bele hetan kobertura sistema televizaun dijitalizasaun RTTL, Ep dijitál terestre ne’e bele benefisia tebes ba ita nian komunidade”, ministru afirma.
Iha fatin hanesan, Diretór Empreza PT. Global Citra Utama hosi Indonézia, Edes Hartono Salim, sente kontente tanba Governu Timor-Leste bele fó fiar hodi bele halo instalasaun ba tore.
“Ha’u hanesan Diretór kompañia PT. Global Citra Utama Indonézia, ha’u kontente tebes ho konfiansa Governu Timor-Leste hodi fó ba ami liuhosi projetu instalsaun ne’e. Ami hato’o ami nia obrigadu tanba Governu bele servisu hamutuk ho ami liuhosi kooperasaun ida ne’e hodi ajuda halo dezenvolvimentu ba televizaun dijitál hodi apoia televizaun iha Timor-Leste”, nia dehan.
Nia garante sei konklui projetu instalasaun tore tuir kontratu ne’ebé asina ho Governu Timor-Leste. Tanba PT. Global Citra Utama iha esperiénsia tinan 20 ba instalsaun projetu sira hanesan ne’e.
Jornalista: Natalino Costa
Editór : Zezito Silva
