Top

PR husu STAE-CNE servisu ho profisionál iha Eleisaun Parlamentár 2023

Prezidente Repúblika, José Ramos Horta. Imajen Tatoli/Egas Cristovão

DILI, 24 fevereiru 2023 (TATOLI)—Prezidente Repúblika, Jose Ramos Horta, husu ba órgaun eleitorál sira hanesan Sekretariadu Tékniku Administrasaun Eleitorál (STAE) no Komisaun Nasionál eleisaun (CNE) atu halao servisu ho profisionál iha eleisaun Lejizlativa 2023 ne’e.

Notísia Relevante: Prezidente Repúblika dekreta loron eleisaun Parlamentár iha 21 maiu

“Ha’u apela ba tékniku no profisionál sira husi órgaun eleitorál sira atu labele monu ba manipulasaun polítika iha eleisaun Lejizlativa. Se profisionál no tékniku sira hala’o sira-nia servisu ho forma independente no profisionál, konfiansa públiku nian iha país ne’e sei hetan,” Prezidente Repúblika, Jose Ramos Horta, hateten ba jornalista sira hafoin ramata sorumutuk ho órgaun eleitorál sira, iha edifísiu STAE, Caicoli, sesta ne’e.

Xefe Estadu ne’e hateten, bainhira órgaun eleitorál sira hala’o sira-nia servisu ho susesu, povu Timor-Leste sei respeita sira-nia instituisaun no instituisaun sira seluk iha Estadu, tantu F-FDTL no PNTL.

Horta hateten, órgaun eleitorál sira hala’o ona sira-nia servisu iha eleisaun ikus ne’e bele la’o ho hakmatek hodi labele hamosu problema iha loron eleisaun 21 maiu 2023 ne’ebé sei mai ne’e.

“Ha’u hein katak eleisaun ne’e sei la’o ho kalma no sei la iha problema iha loron 21 maiu iha tempu eleisaun nian,” nia hateten.

Xefe Estadu sei análiza alterasaun dalimak ba lei eleitorál ba Parlamentu Nasionál no nia parte apela ba órgaun eleitorál sira atu hahú servisu ho lei eleitorál atuál ne’ebé Parlamentu Nasionál aprova ona.

Prezidente Komisaun Nasionál Eleisaun (CNE), José Agostinho Belo, hateten agora daudaun sira halo hela atividade hanesan edukasaun sívika, nune’e eleitór sira bele preparadu hodi tuir eleisaun parlamentár.

“Nune’e loron ida rua ita-nia ekipa ba rai-li’ur atu halo funsaun rua mak edukasaun sívika no resensiementu eleitoral ba eleitor sira. Tanba ne’e, ami CNE ho STAE servisu hamutuk hodi oináa susesu ba eleisaun parlamentár nee. Nunee mós ajuda partidu sira atu halo supervizaun ba prosesu eleisaun ne’e, nune’e asegura eleisaun ne’e ho diak,” nia hateten.

Diretór Jeral STAE, Acilino Manuel Branco, hateten iha eleisaun parlamentár parte eleitorál nian halo serbisu hanesan baibain no oras ne’e komesa prepara ona tékniku sira no halo mós lina kordenasaun ho órgaun relevante sira, oinsá halo hala’o eleisaun la’o ho di’ak no transparánsia.

Diretór Jerál ne’e mós mós hatete, STAE preparadu no oras ne’e hala’o daudaun iha Munisipiu sira no sira mós garante katak sei hala’o kna’ar hotu ho profesionál no transparánsia.

Kalendáriu eleisaun parlamentár 2023

  1. Loron 5 fulan-marsu, harii koligasaun partidária no komunikasaun ba CNE
  2. Loron 15 fulan-marsu, aprezentasaun lista kandidatura ba STJ/Tribunál Rekursu
  3. Loron 25 fulan-marsu, STJ/Tribunál Rekursu verifika kandidatura sira (regularidade prosesu, autentisidade dokumentu, elejibilidade kandidatu sira) no notifikasaun ba reprezentante kandidatu sira
  4. Loron 26 fulan-marsu, interpozisaun/aprezentasaun rekursu ba koletivu STJ/Tribunál Rekursu kontra desizaun admisaun/rejeisaun kandidatura sira nian
  5. Loron 28 fulan-marsu, koletivu STJ/Tribunál Rekursu deside kona-ba rekursu ne’ebé aprezenta ba desizaun admisaun/rejeisaun kandidatura sira-nian
  6. Loron 27 ka loron 29 fulan-marsu, publikasaun iha Jornál Repúblika kona-ba kandidatura sira ne’ebé admite ona ho definitive
  7. Loron 28 ka loron 30 fulan-marsu, sorteiu ba kandidatura sira-ne’ebé admite ona hodi atribui ordenasaun iha buletin votu + afiksasaun/publikasaun akta. Harii sentru votasaun no estasaun votu nian
  8. Loron 21 fulan-abril, STAE divulga númeru no fatin ba sentru votasaun no estasaun votu nian. 

KAMPAÑA ELEITORÁL 

  1. Loron 19 fulan-abril to’o loron 18 fulan-maiu, períodu ba kampaña eleitoral. Eleisaun no apuramentu rezultadu.
  2. Loron 21 fulan-maiu, loron eleisaun (tuku 07h00 daeersan to’o tuku 15h00 lorokraik).

LORON ELEISAUN

  1. Loron 21 fulan-maiu, hahú kontajen ba votu iha sentru votasaun no tuirmai haruka urna sira ba apuramentu Munisipál/Rejionál
  2. Loron 21 fulan-maiu, hahú kontajen ba votu no apuramentu rezultadu iha sentru votasaun sira iha rai-li’ur
  3. Loron 21 to’o loron 23 fulan-maiu, apuramentu rezultadu iha nivél Munisipál/Rejionál no haruka akta eleitorál no mós elementu sira seluk (votu reklamadu no aprezenta reklamasaun) ba CNE.

Notísia Relevante: Partidu 24 sei konkorre iha eleisaun parlamentár 2023

Jornalista : Osória Marques

Editór       : Cancio Ximenes

Publisidade

Leave a Reply

Latest Post

error: Content is protected !!