DIT FC dudu-sees Zebra FC ho 2-1

DILI, 25 fevereiru 2023 (TATOLI)–Jogu kontinuasaun Liga Futeból Timor-Leste (LFTL) segunda divizaun ne’ebé hala’o iha Estádiu Munisipál Dili, sábadu 24.02) lorokraik ne’e, klube DIT FC kontra Zebra FC ne’ebé to’o ikus DIT FC dudu sees Zebra FC ho goli 2-1.

Bainhira jogu hahú, iha duut matak be nahe-an ne’e nia leten, jogadór ekipa rua lansa kedan kontra-atake ba malu tuir tékniku no abilidade ida-idak nian atu buka hatama golu.

Iha jogu ne’e, DIT hatudu kedan nia performe ne’ebé brillante hodi halo jogu atrativu iha liña oin Zebra nian, nune’e jogadór DIT, Boaventura Kalau (8), aproveita oportunidade lansa kedan xutu ida hodi hatama golu iha minute 51 ho skor 1-0 tanba guarda rede Zebra nian, Belmiro Belo (1), labele antesipa ho di’ak.

Golu dahuluk ne’e hanesan golu ne’ebé lais liu tanba ba dahuluk iha liga komesa to’o ohin loron, istória ida-ne’e foin akontese ba ekipa ho kamijola azul ne’e.

Ho golu ne’ebé iha halo adeptus DIT nian ne’ebé tur nakonu iha tribun leten fó apoiu másimu ba DIT FC hodi hakilar ho lian semo aas maske ho lian ne’ebé rona hosi dook hodi hakilar “bavo DIT”, hanesan fó beran ba jogadór sira atu hakaas luta nafatin ba nafatin.

Ho lian mihie ida-ne’e, adeptus Zebra nian hakuak hirus matan ho esperansa laek no tuur monok hodi asiste jogu ho hakmatek, tanba tempu sei naruk hodi fó biban ba sira-nia ekipa (Zebra) hodi bele konra-atake no bele rezulta golu tuir sira mehi.

Esforsu hotu jogadór hosi Zebra hakarak halai makaas hanesan kuda zebra ne’e hakarak halai lais no hatama golu lais, maibé esforsu hirak ne’e hela de’it mehi mamuk tanba jogador DIT FC ne’ebé hamriik iha liña defeza la fó fatin sira atu bele lees rede baliza DIT nian.

Buat ne’e mosu no drama ne’ebé akontese iha kampu laran mak ekipa rua, liu-liu jogadór DIT FV hatudu jogu ofensivu ho modelu tiki-taka uitoan halimar mós bola aas no fó biban ba avansadu José Santos (7) hanesan kapitaun hetan oportunidade livre barak, maibé nia la konsege hatama golu tanba xutu ne’ebé nia halo halo bola sempre semo sees hosi nia lavu.

Maibé iha menutu 12, oportunidade di’ak monu tan ba DIT tanba halo kontra-atake ne’ebé makaas halo jogadór Zebra book an araska, ho nune’e jogadór Lambetrto Ximenes (28) hetan bola ne’ebé pasa hosi nia kolega José Santos hodi ezekuta kedan hosi lina li’ur ba rede Zebra nian, bola haknuuk ba rede laran hodi muda skor 2-0.

Hosi golu daruak ne’e, jogadór Zebra nia mentál monu hodi rezulta joga iha kampu laran hanesan ema esperansa laek, maibé ho espíritu Kulugisa nian sei forte, jogadór sira nunka lakon esperansa tanba nafatin esforsu iha kampu laran maske la hatama golu to’o iha minutu 45 nia rohan ka primeira parte ramata ho skor 2-1..

Tama segunda parte, ekipa rua nafatin lansa kontra no atake ba malu, tanba hatene ona estratéjia DIT nian, treinadór Zebra Rogerio Mok halo mudansa ba formasaun jogadór iha kampu laran halo ekipa DIT book an la di’ak, Aadeptus Zebra sira komesa hakilar fó fali apoiu másimu ba sira-nia ekipa favoritu ne’e tanba hatudu ona jogu bonitu.

Esforsu ne’ebé Zebra hatudu la hela de’it hanesan esforsu maibé tama ba minutu 55 segunda parte nian, jogadór Helio Ribeiro (11) aproveita oportunidade halo barullu iha liña oin DIT nian, nia lansa kedan xutu ida halo guarda rede DIT nian, Aderito Fernandes (55) halai sala no bola tama kedan hodi muda rezultadu ba skor 1-2.

Golu ne’e hanesan golu fó espíritu ksolok nian ba adeptus Zebra nian hodi hakilar no hakilar, no lian hakilar ne’e hanesan atu halo rahun de’it Estádiu ne’e hodi haklalak “Forsa Zebra, forsa Zebra, forsa, forsa…”

Ekipa rua nafatin hatudu jogu bonito maibé iha jogu ne’e la akontese tan golu ruma to’o minutu 90 termina, nune’e laiha tan golu ruma mak akontese ba ekipa rua nia vitoria no hela ba DIT rekolla pontu tolu, enkuantu Zebra hela ho derrota ho pontu zero.

Eskuad DIT:

Aderito Fernandes (55), Anito Cesario (12), Ervinho Soares (20), Ubaldo Belo (16), Lamberto Ximenes (28), Dino Amaral (77), Boaventura Kalau (8), José Santos (7), Serafim Brito (17), Jossin da Cunha (10) no Elvis Silva (9).

Suplente:

Joanico Guterres (31), José Gomes (30), Romario Moniz (23), Feliciano Gonçalves (19), Leopoldo Guterres (66), Xavier Sila (29), Edivaldo Castro (24), Rui da Costa (24), Rui da Costa (11), Marcos Barros (82), Zito Morreira (5) no Leonardo Barros).

Treinadór: Armand

Eskuad Zebra:

Belmiro Belo (1), Octavio Mesquita (6), Leonel Gama (3), Gabriel Belo (21), Vasco Boavida (2), Valentim Freitas (16), Juvencio Cabral (22), Estevão Soares (7), Ireneu Correia (9), Dionisio da Silva (17) no Bernadino Baz (23).

Suplente:

João Marçal (20), Rique Correia (4), Nicodemos Pereira (5), Celio Soares (10), Heriberto Guterres (12), Olimpio Ximenes (13), Tito Belo (24), Olivio Belo (15) no Helio Ribeiro (11).

Treinadór: Rogerio Mok

Jogu ne’e dirije hosi árbitru Pedro Braga, juiz liña Elvis Ximenes, Silvino Vieira no árbitru rezerva Fernando do Rego.

Jornalista : Hortencio Sanchez

Editór       : Canbcio Ximenes