Kooperativa CU-FALIRA realiza AJM garante sustentabilidade ekonómia membru sira-nian
DILI, 25 fevereiru 2023 (TATOLI)—Kooperativa Créditu Uniaun Furak Aban Iha Liman Rasik (CU-FALIRA), sábadu ne’e, realiza Asembleia Jerál Membru (AJM) ba dala-V ho objetivu atu garante sustentabilidade ekonómia família nian ba membru sira-nian.
Prezidente Interinu CU-FALIRA, Celestino Rangel, hateten kooperativa refere hamriik ona hanesan kooperativa uniaun kréditu tinan sanulu ona, nune’e kada tinan sempre realiza asembleia jerál hodi aprezenta progressu, dezafiu nomós planu kooperativa nian ba futuru.
“Ohin, ita realiza Asembleia Jerál Membru ne’e hanesan orgaun aas liu iha kooperativa objetivu halibur membru hotu hodi aprezenta no hala’o diskusaun ba planu sira kooperativa nian ba futuru bele sai di’ak liutan,” Celestino Rangel hateten iha salaun Federasaun Kooperativa Kréditu Hanai Malu iha Bairru Pite.
Diretór Jeral Promosaun no Dezenvolvimentu Kooperativa iha Sekretária Estadu Kooperativa (SECooP, sigla portugés), Francisco Xavier, hateten kooperativa iha Timor-Leste hahú dezenvolve maka’as tanba aleinde númeru membru aumenta iha mós kresimentu finanseira.
“Movimentu kooperativa iha nasionál nomós munisípiu hahú dezenvolve makaas tanba daudaun ne’e totál kooperativa iha teritóriu laran hamutuk 452, ne’ebé kompostu hosi kooperativa Créditu Union hamutuk 127, kooperativa Produsaun hamutuk 325 no membru Cooperativa hamutuk ema na’in-118.000. Hosi kooperativa hirak ne’e, kapitál ne’ebé iha hamutuk millaun $38-resin,” nia hateten.
Nia dehan, haree ba kooperativa ne’ebé mudansa boot Governu liuhosi SECoop kontinua apoiu kooperativa sira-ne’ebé eziste iha territóriu nasional, liuhosi formasaun no kapasitasaun hodi jere kooperativa la’o ho di’ak no garante sustentabilidade funsionamentu kooperativa.
Nune’e, nia dehan, liuhosi Asembleia Jerál Membru ne’e, forum deside mós eleze estrutura foun ba períodu 2023-2026 ne’ebe lidera hosi Fernando dos Reis.
Prezidente eleitu CU-FALIRA, Fernando dos Reis, hateten nia sei servisu makaas no husu membru sira atu nafatin ativu iha kooperativa no sai na’in ba kooperativa refere.
“Hanesan Prezidente eleitu ba koperativa ida-ne’e, ha’u sei servisu tuir de’it estatuta kooperativa nian ne’ebé eziste. Nnune’e, husu membru hotu atu ativu hodi apoiu kooperativa tanba kooperativa sei tulun ita atu hadi’a ita-nia ekonómia família no sente kooperativa sai na’in ba ita hotu,” nia dehan.
Koperativa kreditu CU-FALIRA rasik hahú eziste uniaun kreditu iha loron 04 fevereiru 2014 no rejistadu iha Ministériu Justisa.
Kooperativa ne’e harii ho vizaun ida mak harii uniaun kreditu ida-ne’ebé forte, saudável no kompetetivu hodi harii sosiedade ida forte finansiamentu no ekonomikamente, ho misaun garante transparante hodi asegura prosperioridade membru sira-nian.
Jornalista : Arminda Fonseca
Editór : Cancio Ximenes
