Fevereiru ne’e, Labarik 227 sei termina sira-nia eskola iha uma
DILI, 27 fevereiru 2023 (TATOLI) – Labarik hamutuk na’in 227 ne’ebé partisipa programa Eskola Iha Uma (EIU) hosi sentru hamutuk 14 iha Munisípiu Dili sei termina sira-nia prosesu ensinu aprendizajen iha fulan fevereiru tinan ida ne’e.
Diretór Programa HANDS, Pedro Ximenes relata katak Governu Timor-Leste liuhosi Ministériu Edukasaun Juventude no Desportu estabelese ona programa Eskola iha Uma ho objetivu atu fasilita labarik ho idade Pre-eskolár no Ensinu Báziku ne’ebé seidauk asesu ba Pre-eskolár no Ensinu Báziku iha Dili. Projetu ne’e konsidera hanesan projetu pilotu ho alvu implementasaun primeiru iha Munisipiu Dili.
Projetu pilotu ida-ne’e regula iha Dekretu Lei nu.35/2022 no inklui iha Orsamentu Retifikativu ho alvu labarik idade pre-eskolár no ensinu báziku tinan 5-7. Objetivu prinsipál mak atu prepara labarik sira ho edukasaun sedu, nune’e, bele fasilita labarik sira halo tranzisaun ida di’ak ba ensinu báziku klase 1 iha tinan eskolár 2023. Programa ida ne’e sei fó prioridade ba labarik sira tinan 5-7 ba leten.
“Projetu ne’e sei fó oportunidade ba labarik sira hosi tinan 3-4 atu bele hola parte iha atividade Eskola iha Uma (EIU) nune’e bele prepara sira ba Pre-Eskolár iha grupu B. Faze implementasaun ba atividade Eskola iha Uma ne’e hahú kedas iha fulan Jullu tinan 2022. inisia ho formasaun fasilitadór, preparasaun kurríkulu semana sanulu resin tolu, formasaun manorin kazuál, inklui faze pilotajen ba sentru 5 ne’ebé konklui ona atividade iha Dezembru 2022,” nia dehan iha sentru Bela-Vista Lahane Orientál foin lalais ne’e.
Baze legal seluk ne’ebé garantia implementasaun EIU mak Diploma Ministerial nu.37/G-MEJD/VIII/2022 ne’ebé integra knaar hosi parte hot-hotu iha laran hodi bele apoiu foti desizaun ida di’ak no estratéjiku hodi apoiu susesu projetu Eskola Iha Uma ho referénsia ba baze legál rua mensiona,
Ekipa jestaun programa EIU to’o ohin loron hala’o ona atividade ba sentru 36 no rejistu ona labarik sira ho totál 961. Sentru EIU 5 konklui atividade iha loron 16 fulan dezembru tinan 2022 ho total estudante 123 ne’ebé hetan sertifikadu hodi kontinua iha Ensinu Báziku ne’ebé besik.
Etapa segundu ne’e, Sentru EIU 14 mak sei kompleta karga oráriu ba semana 13 iha fin Fevereiru ne’e (23-28) tinan 2023. Sentru 14 ne’ebé atu kompleta ona karga oráriu iha semana ne’e mak hanesan, Rai kuak, Bela Vista, Metin, Tuba Rai, Donoge, Toko Baru, Fatuk Francisco, Ai-lele-Hun 1, 2 no 3, Caisabe, Sahan, Has Laran-Lebutun no Mantelolao. Totál estudante 227 mak sei konklui sira-nia estudu iha programa Eskola iha Uma.
Ministériu Edukasaun iha esperansa boot katak labarik ki’ik-oan sira, atu bele aprende ho di’ak no sai futuru nasaun nia presiza hetan oportunidade adekuadu no kondisaun atu bele aprende sedu. Nune’e Eskola iha Uma eziste atu bele tulun labarik sira ne’ebé mak la konsege aprende sedu iha pre-eskolár bele hetan oportunidade hodi bele aprende sedu.
Ministériu Edukasaun implementa programa EIU liuhosi harii sentru iha kada aldeia, suku no postu administrativu sira iha Dili laran ho kooperasaun másimu ho autoridade lokál no komunidade sira hodi bele akomoda labarik sira ne’ebé seidauk asesu ba pre-eskolár ka sai hosi Ensinu Báziku klase 1.
Iha fin fulan marsu tinan ne’e, tuir planu MEJD, sei realiza tan serimónia entrega Sertifikadu ba labarik sira iha Sentru sanulu-resin-hitu ho totál estudante 306. Total manorin kazuál ba Eskola iha Uma ne’ebé asina ona kontratu ho MEJD no tuir ona formasaun hamutuk 93. Hosi númeru ne’e, manorin hamutuk na’in 79 mak alokadu ona ba programa EIU, no espalla iha sentru 36 iha Dili laran.
Jornalista: Tomé Amado
Editór: Rafael Ximenes de A. Belo
