DILI, 27 fevereiru (TATOLI) – Prezidente Autoriedade Protesaun Sivíl (APC, sigla portugés) Superintendente Polísia, Ismael da Costa Babo, husu ba komunidade ne’ebé atu halo viajen ba munisípiu liuhosi terestre no marítima tenke kudadu tanba agora tempu udan.
“Husu ba ita nia sidadaun sira, temporiamente bele dehan katak fenómenu atuál ne’e mais komplexu, liuliu ba ita-nia maluk sira ne’ebé mak halo viajen bá illa Atauru no mós ba ita-nia maluk sira halo viajen bá Enclave Oecusse, husu ba ita nia operadór-sira lori ró tenke akompaña mós ho metórolojia. Halo viajen karik iha tempu extrimu ruma, di’ak liu ita kansela ita nia viajen”, Superintendente Polísia, Ismael da Costa Babo, hateten ba jornalista sira iha nia kna’ar fatin Caicoli, segunda ne’e.
Babo mós husu ba sidadaun sira liuliu peskadór atu suspende sira nia atividade iha tasi-laran.
Aleinde ne’e, Prezidente APC mós husu ba sidadaun sira ne’ebé mak halo viajen liuhosi Terrestre, hosi Dili ba munisípiu no hosi munisípiu mai Dili, tenke viajen ho kuidadu, tanba agora udan komesa ho intensidade bo’ot ne’ebé provoka rai monu no mota komesa tún bo’ot ai-tohar barak.
“Entaun, sé bele karik kuandu ita-nia viajen la ho nesesidade, ita bele suspende no husu ba ita-nia maluk kondutór sira liuliu sira ne’ebé sempre liuhosi dalan foun Manleuna Mota Comoro-nia ulun, sé bele karik ita buka fali dalan alternativu, liu fali hosi diresaun dalan bo’ot Dili Aileu nian atu ita bele prevene asidente”, nia sujere.
Nia hateten, sidadaun hotu iha direitu hodi halo viajen, maibé agora daudaun tama ona ba tempu udan, sidadaun sira mós tenke konsiente.
“Seguransa ba ita vida ne’e importante, labele tau ita-nia aan iha risku sá tán ba dezastre sira, tanba ne’e hosi Autoridade Protesaun Sivíl husu atu sidadaun tenke halo viajen ho kuidadu atu ita bele prevene dezastre sira”, Babo konklui.
Jornalista: Natalino Costa
Editór : Zezito Silva
