Top

APC reune ho komandante operasaun hosi munisípiu 13 inklui RAEOA

Prezidente Autoridade Protesaun Sivil, Ismael da Costa Babo. Imajen Tatoli/Francisco Sony

DILI, 27  fevereiru (TATOLI) – Prezidente Autoriedade Protesaun Sivíl (APC, sigla portugés) Superintendente Polísia, Ismael da Costa Babo, dehan APC halo enkontru kordenada ho Komandante Operasaun Munisipiu 13 inklui Rejiaun Administrativa Espesiál Oe-Cuse Ambeno (RAEOA) hodi toka asuntu tolu importante.

Nia mensiona katak asuntu ne’ebé  ami koalia iha reuniaun koordenada ne’e mak komandante operasaun sira bele relata situasaun iha teritórriu nasionál, seluk fali toka mós oinsá atu fó asisténsia ba maluk sira ne’ebé karik hetan asidente iha kampaña eleitorál no ikus liu mak aborda mós asuntu eklipse solar ne’ebé sei mosu iha fulan abríl.

“Enkotru ida agora ne’e, ami bolu enkontru estrutura Komandu ho Diresaun Nasionál sira hotu iha Autoridade Protesaun Sivil (APC) ho objetivu  koalia kona-ba pontu tolu importante ne’ebé temi ona iha leten”, Superintendente Polísia, Ismael da Costa Babo, hateten ba jornalista sira iha nia kna’ar fatin Caicoli, segunda ne’e.

Tuir nia, reuniaun ne’e koalia klean liu kona-ba dezastre natural sira ka anin ho udan boot iha munisípiu sira, entaun intervensaun saida mak presiza atu halo. Nune’e mós Timor-Leste atu selebra eleisaun lejisltiva, entaun preparativu saida hosi APC atu halo mak fó asisténsia ba ema ne’ebé hetan asidente iha períodu kampaña eleitorál.

“Ita hotu hatene katak kuandu iha kampaña sira ne’e, iha asidente tráfegu barak tebes, tanba ne’e ita tún atu alerta ho objetivu atu asegura ita nia viajen ba munisípiu sira no hosi foho mai Dili. Atu protesaun sivil prepadu, kuandu iha asidente ruma, ami bele apoiu, karik mosu karreta soke malu ruma ka karik karreta baku fila ruma karik, ami bele fó asisténsia lalais”, nia revela.

Nia rekorda, iha Eleisaun Prezidensiál 2022, iha Lautém apoiante hosi kandidatura prezidente balun hetan asidente ka karreta baku fila no iha mós karreta soke malu to’o rezulta vitima balun.

Nia akresenta, APC prepara ona veíkulu balun hodi responde ba situsaun sira ne’e.

“Ami garante kuandu ita-nia sidadaun sira hetan asidente iha kampaña eleitorál, ami nia ekipa iha munisipiu sira preparadu no prontu atu fó asisténsia ba ita-nia maluk ne’ebé hetan asidente iha kampaña eletorál”, nia adianta.

“Liuhosi reuniaun ida ne’e fó hanoin ba komandu operasaun iha munisípiu sira inklui RAEOA atu sira bele halo sensibilizasaun ba ita-nia komunidade atu fenómenu ida mosu karik sira labele hakfodak”, nia konklui.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!