MNEK-IOM diskute asuntu migrasaun iha Jeneva

DILI, 27 fevereiru 2023 (TATOLI) – Ministra Negósiu Estranjeiru no Kooperasaun (MNEK) Adaljiza Albertina Xavier Reis Magno, hasoru malu ho Diretór-Jerál Servisu Migrasaun Internasionál (IOM-sigla inglés) Antonio Vitorino, hodi koalia kona-ba asuntu migrasaun nian no dezde apoiu Timor-Leste, iha Jeneva.

“Bainhira hasoru malu ho IOM diskute kooperasaun entre Timor-Leste ho IOM kona-ba kestaun migrasaun nian, Timor-Leste hato ‘o mós agradesimentu ba kooperasaun durante tinan barak nia laran no posibilidade atu fó apoiu ba kooperasaun iha área migrasaun laborál nian”, tenik iha komunikadu ne’ebé Agência TATOLI asesu hosi media MNEK, ohin.

Aleinde ne’e, Ministra Magno hasoru malu mós ho reprezentante permanente sira husi Austrália, Nova-Zelándia, Samoa, Vanuatu, Illa Marshall no Enkarregadu Nauru iha Jeneva ho objetivu atu diskute kestaun hirak ne’ebé sai hanesan interese komún, inklui direitu umanu, mudansa klimátika, komérsiu no igualdade jéneru.

Hahú ohin no aban Ministra Magno sei partisipa iha Sesaun Nivel Altu Konsellu Direitus Umanus nian ba dala-52, ne’ebé sei hala’o iha Palais des Nations.

Iha Sesaun Nivel Altu ne ‘e, Ministra sei hato’o pozisaun no prioridade sira iha nasaun ba área direitu umanu nian, no hato’o deklarasaun ida hodi Komunidade Países ne’ebé koa’lia Lian Portugés (CPLP, siglá-português) nia naran durante Painél Anuál Nivel Altu ne’ebé foka liubá “reflesaun kona-ba tinan lima husi Estratéjia Juventude Nasoins Unidas nian (tinan 2030): halo mapeamentu ida ba pasu sira tuir mai”.

Iha okaziaun Segmentu Nivel Altu nian, Ministra Magno mós sei hala’o enkontru bilaterál no sorumutuk kortezia ho parte interesada relevante sira, inklui Prezidente Komité Internasionál Kruz Vermella  (ICRC, siglá-inglés) Mirjana Spoljaric.

Iha parte seluk, ministra ne’e hetan mós oportunidade informalmente hasoru malu ho reprezentante permanente Portugál nian iha Gabinete Nasaun Unida no Organizasaun Internasionál sira iha Jeneva, Embaixadór Rui Macieira hodi ko’alia mós kestaun oioin, inklui kandidatura Timor-Leste nian ba Konsellu Direitus Umanus iha tinan 2027-2029 no prosesu adezaun Timor-Leste nian ba Organizasaun Mundiál Komérsiu (OMK).

Jornalista:Hortencio Sanchez

Editór : Zezito Silva