Preparativu Boxista Timor-Leste ba SEA Games atinje ona 75%
DILI, 27 fevereiru 2023 (TATOLI) – Treinadór Federasaun Boxe Amadora Timor-Leste (FBATL) Abilio Orlando dos Santos, informa preparativu ba Boxista timoroan sira ne’ebé atu ba kompete iha eventu rejionál SEA Games Kamboja, atinje ona 75%.
“Ita nia preparasaun agora daudaun kompleta ona fulan tolu, ne’ebé prosesu treinamentu sira atinje ona 75%”, Abilio dehan ba jornalista-sira iha Benfica Colmera, ohin.
Nia dehan, federasaun iha ona hanoin atu lori atleta sira ba halo jogu tryout iha rai-liur antes kompete iha eventu.
Nia haktuir, boxista sira hetan ona konvite ida hosi Australia iha eventu ida King of the ring ne’ebé sei hala’o iha Kapitál Sidney, hahú 09-11 marsu, maibé sei tetu hela atu ba compete ka la’e.
“Eventu iha Austrália ne’e ita hetan ona konvite maibé ita sei tetu no hare hela, tanba eventu ne’e bo’ot no atleta hamutuk na’in 300 mak sei compete, se ita Timor-Leste ba hamutuk 306 tanba ita nia atleta na’in neen, ne’e mak haree hela karik ita nia Governu apoiu orsamentu ou patrosinadór balu apoiu orsamentu, ita sei ba partisipa hanesan mós try out ida mak ne’e”, treinadór dehan.
Atleta hirak ne’ebé preparadu atu ba kompete iha SEA Games ne’e mak Delio Mouzinho, Elidio da Conseição, Raimundo Galhos no Dovi Ramos.
Tuir planu, Konfederasaun Desportiva Timor-Leste (CDTL-sigla portugés), iha 03 marsu sei lori atleta hotu hosi modalidade hitu ne’ebé konfirmadu partisipa eventu SEA Games atu ba hotu iha kajerna Polísia Militár (PM) Quintal Boot Dili, atu fasíl kontrola no hala’o treinamentu ho di’ak liután.
Jornalista:Hortencio Sacehez
Editór : Zezito Silva
