UNTL halo ezersísiu atu akomoda estudante foun 4.421
DILI, 27 fevereiru 2023 (TATOLI)–Reitór Universidade Nacional Timor Lorosa’e (UNTL), João Soares Martins, hateten UNTL sei halo ezersísiu boot ida atu akomoda estudante foun 4.421 iha kada departamentu tanba númeru ne’ebé Ministériu Ensinu Superiór Siénsia no Kultura deside ne’e barak liuhosi proposta ne’ebé UNTL husu.
Nia hateten, UNTL hetan estudante foun hamutuk 4.421 ne’ebé kompostu hosi feto 2.817 (74%) no mane hamutuk 1.604 (36%), tanba ne’e sira sei halo ezersísiu boot ida atu akomoda estudante sira-ne’e
“Ami-nia proposta mai hosi fakuldade sira-ne’ebé hetan aprovadu hamutuk 3.620 mak ami submete ba Ministériu Ensinu Superiór, maibé iha desizaun ikus ne’ebé hato’o hosi Komisaun Asesu Engeresu Ensinu Superiór sa’e ba 4.421, kerdizér númeru boot uitoan,” João Martins hateten ba Agência Tatoli iha nia kna’ar fatin Kampus UNTL, segunda ne’e.
Maibé, nia dehan, totál númeru estudante foun ba tinan ida-ne’e ki’ikliu kompara ho estudante foun tinan kotuk nian ne’ebé kuaze 6.000 resin, maibé proposta UNTL nian husu de’it 3.000-resin, entaun tinan ida-ne’e iha redusaun kuaze besik 800.
Nia dehna, númeru estudante foun ba tinan akadémiku 2023 ne’e sempre fó nafatin implikasaun ba situasaun infraestrutura iha UNTL liu-liu sala-de-aula, tanba UNTL sei halo ezersísiu makaas atu bele akomoda hotu estudante sira-ne’ebé pasa ona.
“Ha’u iha esperansa boot katak estudante foun 4.421 ne’e pasa ona mai UNTL ne’e bele halo hotu sira-nia rejista 100%, tanba ne’e oportunidade di’ak. Ne’eduni parabéns ba sira bele tama iha UNTL ne’ebé úniku universidade públiku ida iha Timor Lorosa’e,” nia hateten.
Prezidente Institutu Politékinu Betano (IPB), Acácio Cardoso Amaral, hateten númeru sira prevee hodi propoin ba KAEES ne’e hamutuk 400 maibé rezultadu ikus hosi númeru ne’ebé aprovadu tama mai IPB ne’e iha de’it 383 entaun menus tiha ema 18.
“Ne’e di’ak tanba ami iha IPB iha subsídiu eskolár ami prevee orsamentu ba 400 pesoa de’it, ne’ebé menus hosi ida-ne’e di’ak liután mai ami atu jere asuntu ida-ne’e,” nia hateten.
Jornalista : Tomé Amado
Editór : Cancio Ximenes
