Janeiru-fevereiru, IGJ rekolla reseita bola guling ba kofre Estadu liu $50.000

DILI, 28 fevereiru 2023 (TATOLI)—Ministériu Turizmu Komérsiu no Indústria (MTKI) liuhosi Diresaun Inspesaun Jerál Jogu (IGJ, sigla portugés) hahu hosi janeiru to’o fevereiru 2023 rekolla reseita hosi jogu bola guling liu $50.000.

“Ba jogu bola guling de’it hosi janeiru to’o mai ohin loron ikus ba fulan fevereiru 2023 nian, reseita ne’ebé ami rekolla hosi atividade jogu tradisionál ne’e  iha nivel nasionál to’o munisípu hamutuk $50.000. Ida ne’e la inklui jogu sira seluk,” Inspetór Jerál, Domingos da Costa Guterres dehan ba Agência Tatoli, iha nia knaar-fatin Bebora, Dili, tersa ne’e.

Nia dehan, jogu tradisionál bola guling ne’e rasik iha kapitál Dili, Governu fó autorizasaun loke iha fatin permanente hamutuk  ualu (8) hanesan, iha Becora, Kulu-hun, Comoro no seluk tan.

Notisia relevante : IGJ rekolla reseita milliaun $3 resin hosi jogu ilísitu no bola guling

“Ba munisípiu sira ita foin loke ba munisípiu tolu hanesan, Manatuto fatin ida, Viqueque (fatin ida) no Bobonaro (fatin tolu). Iha Bobonaro ne’e, ninia fatin mak Bobonaro, Maliana no Batugade,” nia dehan.

Nia dehan, maneira Governu fó empreza sira atu loke bola guling ne’e mak, sira tenke iha fatin ne’ebé seguru, tenke iha kartaun eleitoral ka Billete Identidade (BI) no tenke iha kartaun vasina nian.

Empreza sira loke bola guling tenke iha tempu kalan hahú tuku 21:00 ba leten no iha ne’eba labarik kiik-oan sira labele partisipa no tenke dook hosi fatin eskola no igreja.

“Antes sira atu loke, sira tenke mai rejistu no ita fó durasaun fulan ida, no tenke selu ne’ebe la hanesan entrea nasionál no munisípiu. Ba nasionál kada kalan ida $100, no ba munisípiu kalan ida $50,” nia dehan.

Nia dehan,  IGJ ninia servisu mak  buka  reseita ba Estadu. Ne’ebé, bainhira ema mai hakarak rejistu tenke identifika  no foin fo  autorizasaun. Tanba, sira tenke selu antes mak foin loke atividade bola guling.

Jornalista : Arminda Fonseca

Editora     : Armandina Moniz