Janeiru Sentru Saúde Vera Kruz rejista pasiente ISPA hamutuk 1.208
DILI, 28 fevereiru 2023 (TATOLI) – Xefe Sentru Saúde Vera Kruz, Marilia Piedade, hateten iha janeiru sentru internamentu Vera Kruz rejista pasiente moras Infesaun Vias Respiratóriu Aguda (ISPA) hamutuk 1.208.
“Iha fulan janeiru, moras Infensaun Vias Respiratóriu Aguda (ISPA) iha ne’e hamutuk 1.208, husi númeru ne’e afeta ba labarik tinan lima mai kraik no mós ema boot sira”, Marilia Piedade dehan ba jornalista sira iha nia kna’ar fatin Caicoli, ohin.
Nia informa, moras ISPA nia kauza haree ba tempu bailoron no udan monu rai depois rai rahun suar. Ida ne’e mak afeta. Atu evita ida ne’e presiza uza maskara no fase liman.
“Atu halo prevensaun ba moras ne’e mak bainhira la’o ka viajen ruma presiza uza maskara no fase lima bainhira atu han aihan ruma”, nia dehan.
Aleinde moras ne’e, Sentru Saúde Vera Kruz mós rejista moras kulit hamutuk 2.054, diárea 203 pneumonia 37, moras hadaet relasaun sexuál 32, asidente tráfiku 19, asidente sira sira seluk hamutuk 55 no kazu dengue hamutuk 15.
Sentru Saúde Vera Kruz mós enfrenta estoke aimoruk ne’ebé menus maibé ida ne’e la signifika konsulta mós la lao maibé aimoruk balun ne’ebé bele substitui hodi fó pasiente sira ne’ebé mak baixa liu loron tolu.
“Iha medikamentu balun estoke la iha hanesan antibiótiku ampisilin maibé ida ne’e la signifika konsulta la la’o, ita nia onsulta kontinua lao nafatin, entaun ami buka hela alterantivu atu responde ba ida ne’e mak bainhira pasiente ne’ebé mak baixa, ami halo transferénsia ba Hospitál Nasionál Guido Valadares (HNGV) hodi hetan aimrouk ne’ebé mak pasiente sira persiza”, nia esplika.
Entertantu, profisionál saúde ne’ebé mak halao kna’ar iha Sentru Saúde Vera Kruz hamutuk 80, husi ne’e médiku na’in 32, parteira 23, enfermeiru 20 no tekniku aliadu na’in-lima.
Jornalista : Felicidade Ximenes
Editór : Zezito Silva
