MAPKOMS-RTTL selebra akondu transmisaun programa debate eskluziva
DILI, 28 fevereiru (TATOLI) – Ministru Asuntu Parlamentár no Komunikasaun Sosiál (MAPKOMS) Francisco Jerónimo, dehan MAPKOMS selebra akordu ho Rádiu no Televizasaun Timor-Leste, Empreza Públika (RTTL, E.P.) ba programa debate eskluziva ne’ebé sei transmite iha kanál RTTL, E.P.
“Ohin MAPKOMS ho RTTL,E.P selebra akordu kooperasaun ida ba reativasaun programa debate eskluziva, ne’ebé sei transmite iha kanál RTTL.E.P”, Francisco Jerónimo, dehan ba jornalista sira iha Gabinete MAPKOMS, Palásiu Governu, tersa ne’e.
Programa debate eskluziva sei koalia liu kona-ba diversu ba asuntu iha kada área espesífiku hanesan servisu governasaun durante ne’e, situasaun polítika rai-laran inklui situsaun saida mak agora daudaun ne’e akontese iha Timor-Leste liga ba trend issu sira ne’ebé importante.
Programa debate eskluzivu ne’e sei hahú iha semana ida dala ida no programa ne’e rasik sei envolve hotu kada ministériu sira no entidade Estadu hotu.
“Liuhosi programa debate esluzivu ne’e povu bele akompaña di’ak liután situasaun saida mak durante ne’e akontese iha ita-nia rai Timor-Leste”, governante ne’e adianta.
Iha fatin hanesan, Prezidente RTTL, José Belo, hateten akordu ida ne’e estabelese atu haree liu ba transmisaun direita ba programa debate eskluziva.
“Debate eskluziva ida sei koalia liu ba asuntu barak iha área espesífiku sira liga ba servisu ministériu nian no situasaun polítika sira hodi ita-nia povu bele akompaña”, nia konklui.
Jornalista: Natalino Costa
Editór : Zezito Silva
