iklan

NASIONÁL, EDUKASAUN, DILI, HEADLINE

MEJD husu komunidade okupa fasilidade eskola fila ba sira-nia hela fatin

MEJD husu komunidade okupa fasilidade eskola fila ba sira-nia hela fatin

Diretór-Jerál Administrasaun no Finansa hosi MEJD, Antoninho Pires. Imajen Tatoli/Francisco Sony

DILI, 28 fevereiru 2023 (TATOLI)–Ministériu Edukasaun Juventude no Desportu (MEJD) kontinua husu komunidade hela no okupa fasilidade eskola sira iha munisipiu Dili, tanba Ministériu la prevee osan atu apoiu indemnizasaun ba okupante sira hodi fila ba sira-nia hela fatin.

Diretór Jerál Administrasaun no Jestaun Finansa MEJD, Antoninho Pires, hateten  Ministériu Edukasaun Juventude no Desportu ninia papél mak buka atu identifika de’it okupante sira iha eskola sira depois entrega ba Ministériu Justisa no Munisípiu Dili mak sei trata asuntu ne’e.

“Ami servisu hamutuk ona ho Teras Propriedade atu buka dalan ida-ne’ebé di’ak hodi husu ba okupante sira atu bele hamamuk fasilidade iha eskola sira-ne’ebé sira okupa, maibé ita-nia kompeténsia atu identifika de’it eskola sira-ne’ebé sira okupa depois Ministériu justisa no Munisipiu Dili mak sei haree asuntu ne’e,” Diretór ne’e hateten ba Agência Tatoli iha salaun CITY 8, tersa ne’

Tuir nia, okupante sira deklara ona prontu hamutuk ho eskola sira-ne’ebé sira okupa naran katak VIII Governu Konstitusionál liuhosi Ministériu Edukasaun Juventude no Desportu bele apoiu sira ho osan ruma atu sira bele buka fali fatin ruma hodi kontinua hatutan sira-nia moris.

Nia hateten, Ministériu Edukasaun la prevee orsamentu ba tinan 2023 ne’e atu apoiu okupante sira maibé asuntu idemnizasaun ne’e tenke liuhosi prosesu ida.

“Ami la prevee orsamentu atu apoiu maluk okupante sira-ne’ebé mak okupa hela fasilidade eskola nian karik atu prevee mós tenke liu hosi prosesu ida,” nia dehan.

MEJD hamutuk ho MJ no Autoridade Munisipál Dili buka nafatin halo identifikasaun atu nune’e bele hetan solusaun ida di’ak, atu bainhira tempu to’o ona atu reintegra komunidade ne’e fila ba sira-nia hela fatin labele mosu dezentendiment, ne’ebé Ministériu Edukasaun seidauk bele garante okupante sira-ne’e atu sai bainhira.

Ministru Edukasaun Juventude no Desportu, Armindo Maia, hateten katak problema atu hasai okupante iha eskola sira la’ós fasil tanba okupante sira-ne’e okupa área no fasilidade eskola sira dezde tinan 2000 kedan, ne’eduni atu hasai sira hosi área eskola presiza halo negosiasaun.

“Sira hela iha área eskola ne’e mós ita-nia komunidade ne’ebé ita labele ba duni sai de’it sira, ita presiza halo negosiasaun ida ho sira atu nune’e bele hetan ninia solusaun,” nia hateten.

Governante ne’e mós haktuir bainhira atu hasai okupante iha eskola ida la’ós kompeténsia Ministériu edukasaun nian de’it maibé sei involve mós Ministériu lubuk ida, tanba ne’e VIII Governu konstitusional presiza diskute lai asuntu ida-ne’e ho didi’ak molok halo negosiasaun ho komunidade okupante sira.

Jornalista : Tomé Amado

Editór       : Cancio Ximenes

iklan
iklan

Leave a Reply

iklan
error: Content is protected !!