Profesór voluntária na’in-sia la submete reklamasaun ba Edukasaun Liquiça

DILI, 28 fevereiru 2023 (TATOLI)–Diretór Servisu Edukasaun Munisípiu Liquiça, Carlos Lopes, hateten profesór voluntáriu na’in-sia iha munisípiu Liquiça ne’ebé la hetan kontratu hosi Ministériu Edukasaun Juventude no Desportu (MEJD) la submete sira-nia reklamasaun ba Servisu Edukasaun Munisipál.

Profesór na’in-sia ne’ebé la submete sira-nia reklamasaun ne’e konsidera laiha ona direitu tanba durasaun tempu ne’ebé Ministériu Edukasaun fó ba sira-ne’e iha de’it loron 15, ne’ebé ohin dia 28 fevereiru 2023 ne’e loron ikus ona ba reklamante sira.

“iIa sei la simu tan sira na’in-sia ninia reklamasaun tanba iha ona sirkulár hosi Ministériu Edukasaun katak tempu to’o de’it loron 28 fevereiru 2023, liu ida-ne’e inválidu ona,” Carlos Lopes hateten ba jornalista sira iha salaun City 8, tersa ne’e.

Nia informa, totál dadus profesór voluntáriu iha Liquiça ne’ebé sira-nia dokumentu hetan selesaun hosi ekipa panél juri hamutuk 239 maibé depois anunsia rezultadu iha de’it profesór voluntáriu na’in-56 mak hetan kontratu, ne’ebé hela 183 mak sira-nia dokumentu la pasa. Entre númeru la pasa nee iha na’in sia de’it mak la hatama sira-nia reklamasaun.

Diretór ne’e lahatene razaun saida mak profesór voluntáriu na’in-sia la hatama sira nia reklamasaun, tanba profesór na’in-sia ne’e ida mós la mai hato’o sira nia razaun.

Enkuantu profesór na’in-sia ne’ebé la hatama sira-nia reklamasaun antes ne’e na’in-lima (5) hanorin iha ensinu báziku, na’in rua (2) hanorin iha pre-eskolár no na’in rua (2) hanorin iha ensinu tékniku vokasionál.

Entretantu, ba profesór voluntáriu 174 ne’ebé hatama ona sira nia karta reklamasaun, dirasaun Servisu Edukasaun Munisipál halo ona rekapitulasaun ba lista reklamante sira-nian, ne’eduni iha kuarta (01 marsu 2023) DSEM Liquiça hamutuk ho superintendente, inspetór no mentór lokál sira sei tur hamutuk hodi halo fila-fali verifikasaun ba lista reklamante sira-nian.

Hosi prosesu verifikasaun ne’e mak sei identifika reklamasaun ne’ebé reklamante sira submete ne’e bele sai hanesan matéria ida atu hetan konsiderasaun ka lae, tanba tuir informasaun katak profesór sira-ne’ebé hakat ona ba kontratu ne’e barak mak antes ne’e la hanorin ida.

Jornalista : Tomé Amado

Editór      : Cancio Ximenes