iklan

EKONOMIA, HEADLINE

Ekonómia Azul : MAP esforsu aumenta produsaun rai-laran

Ekonómia Azul : MAP esforsu aumenta produsaun rai-laran

Ministru Agrikultura no peska (MAP), Pedro dos Reis. Imajen Tatoli/Francisco Sony

DILI, 01 marsu 2023 (TATOLI)— Ministru Agrikultura no Peska (MAP), Pedro Reis, hateten, kontribuisaun setór agríkola ba programa ekonómia azul ne’e iha dezafiu boot maibé Governu nafatin iha  esforsu hodi aumenta produsaun rai-laran.

“Programa ekonómia Azul, MAP nia papél importante tebes no nafatin preparadu oinsá atu hasa’e produsaun ai-han iha rai-laran. Atu nune’e Timor mos preparadu wainihira tama iha Oranizasaun Mundiál Komérsiu (OMK) ka ASEAN. Tanba ne’e, gora ita kontinua luta atu hasa’e produtividade liuhosi mellora fasilidade ne’ebé eziste,” Ministru Pedro Reis, hateten ba jornalista sira iha Palásiu Governu, Dili, kuarta ne’e.

Nia dehan, esforsu ne’ebé MAP halo ba parte tasi-laran nian, mak,   Timor-Leste iha ona lei invenstimentu ne’ebé liuhosi Diresaun Jerál Peska mak toma konta. Signifika Timor bele halo esforsu saida mak bele halao  no saida mak labele lao.

“Tanba ita atu investe tasi-laran foti rekusru ne’ebé iha tasi-laran keta haluha katak ita iha mós rekursu naturál balu iha tasi-laran ne’ebé labele estaga,” nia dehan.

Nia dehan, kona-ba produsaun rai-laran nian, durante ne’e, MAP intensifika atu garante sustentabilidade mak antes ne’e kada tinan produsaun ai-han rai-laran hanesan hare, batar no seluk tan bele to’o de’it 48.000 tonelada, maibé ho esforsu sira ne’ebé Governu halo iha tinan 2022, Timor-Leste   hasa’e produsaun hosi 48.000 toneleda ba 68.000 tonelada.

“Signifika, ita iha mudansa boot maske ida ne’e seidauk atende tuir demanda ita-nian kada tinan atu produs 131.000 tonelada,” nia dehan.

Nia dehan, Governu hasa’e produsaun iha rai-laran tanba situasaun difisil ne’ebé durante Timor-Leste, hasoru hanesan pandemia COVID-19, impase polítika, inundasaun no funu entre Rúsia no Ukraina nian halo sasán folin sa’e.

“Entaun ema-nia vontade atu sosa sasán, forsa la to’o halo agrikultór sira filafali ba to’os ho nune’e bele hasa’e produsaun ai-han to’o 68.000 tonelada,” nia dehan.

Membru Governu ne’e dehan, haree ba produsaun ai-han iha rai-laran mudansa, mak tinan ida ne’e, MAP liuhosi Diresaun Jerál Agrikultura propoin atu sosa tan mákina tratór 40, eskavadór haat inklui sasán mákina sira atu reforsa liutan agrikultór sira hasa’e produtividade iha rai laran.

“Tanba daudaun ita la’o de’it ho eskavadór haat ne’ebé ami mobiliza iha territóriu laran,” Pedro hateten.

Tinan ida ne’e, Governu rasik mós halo ona lansamentu ba irrigasaun boot rua, mak Galata iha munisipiu Baucau no Lautém (Laivai) inklui sei halo manutensaun mós ba irrigasaun kiik hamutuk 27 iha territóriu timor laran tomak. 

Jornalista : Arminda Fonseca

Editora    : Armandina Moniz

iklan
iklan

Leave a Reply

iklan
error: Content is protected !!