Kursu saúde animal-peska iha fakuldade Agrikultura UNTL menus dosente
DILI, 01 marsu 2023 (TATOLI)–Dekanu Fakuldade Agrikultura Universidade Nasionál Timor Lorosa’e (UNTL), Vicente de Paulo Correia, konsidera estudante iha Departamentu Saúde Animál no Peska durante ne’e hasoru difikuldade boot, tanba kursu rua ne’e menus dosente atu apoiu matéria iha aula laran.
“Ita ko’alia kona-ba dosente ne’e susar uitoan tanba iha departamentu rua mak laiha dosente sufisiente atu reforsa atividade ba estudante sira. Durante ne’e, ita iha de’it dosente kontratadu mak reforsa hela atividade iha departamentu rua ne’e,” Vicerte de Paulo Correia hateten ba Agência Tatoli iha nia kn’ar fatin kampus UNTL, kuarta ne’e.
Nia dehan, iha departamentu Saúde Animál kuaze tinan barak ona mak matéria lubuk ida labele hanorin ba estudante sira tanba laiha doutór Animál ida mak mai apoiu matéria iha departamentu ne’e.
“Universidade halo duni kontratu ba dosente sira maibé ida-ne’e mós mosu implikasaun boot bainhira sira-nia saláriu tarde, estudante nia valór sira la fó depois sira lakohi mai hanorin ona. entaun halo estudante sira mak sai fali vítima,” nia hateten.
Nune’e mós, nia dehan, Departamentu Peska durante ne’e laiha dosente sufisiente tanba antes ne’e iha desente permanente ida de’it, maibé mosu tiha problema balun nia sai tiha agora kuaze dosente kontratadu mak domina iha departamentu ne’e.
Maibé, tuir nia, Fakuldade iha ona planu balun ne’ebé kontinua halo kontratu ho termu sertu ba dosente na’in-ualu (8) atu mai apoiu iha departamentu rua ne’e, hosi Departamentu Peska nian sei kontratu dosente na’in-haat (4) ho parte tempu ida (1) no hosi Departamentu Saúde Animál nian sei kontratu dosente na’in-tolu (3), atu nune’e bele reforsa atividade ba estudante sira.
Tuir nia, maneira ida-ne’e Fakuldade halo atu estudante sira labele sai fali vítima tanba loloos instituisaun ensinu superiór Públiku ida labele hetan problema ida hanesan ne’e, bele iha maibé tenke buka meiu hodi rezolve kedan atu nune’e kredibilidade universidade nian labele hamosu pergunta iha públiku.
Antes ne’e, Universidade loke ona rekrutamentu vaga hamutuk 51 ba dosente Permanente atu apoiu ba fakuldade sia iha UNTL nia laran.
Hosi fakuldade Agrikultura nian propoin dosente permanente na’in-neen (6) de’it ne’ebé ho planu atu koloka iha Departamentu Saúde Animál, Peska no Floresta.
Iha área Saúde Animál nian rekruta dosente permanente na’in-rua (2) no laboratóriu ida depois Peska na’in-rua (2) inklui floresta ida (1), maibé rezultadu fó sai hosi Komisaun Funsaun Públiku sira-ne’ebé pasa mak iha Saúde animál ida no laboratóriu ida seluk lakon direitu.
Entretantu, iha fakuldade Agrikultura durante ne’e eziste departamentu lima maibé depois loke tan departamentu foun ida agora hamutuk neen.
Hosi Departamentu sira-ne’ebé kompostu hosi Departamentu Agronomia, Departamentu Agro Sósiu Ekonomia, Departamentu Pekuária, Departamentu Saúde Animál, Departamentu Peska no Departamentu Soru.
Jornalista : Tomé Amado
Editór : Cancio Ximenes
