Malazia deporta timoroan 14 mai Timor-Leste
DILI, 02 marsu 2023 (TATOLI) – Ministériu Interiór liuhosi Diresaun Jerál Servisu Migrasaun simu sidadaun timoroan na’in-14 ne’ebé deporta husi Malázia mai Timor-Leste.
Timoroan hirak ne’e, Governu Malazia deporta mai ho aviaun Batik Air ho númeru OD8213.
“Sidadaun timoroan na’in-14 ne’e migrasaun Malázia deporta mai Timor-Leste tanba deskonfia servisu ilegál no komete krime organizadu balun”, Vise Ministru Interiór, António Armindo dehan liuhosi komunikadu ne’ebé Agência TATOLI asesu, ohin.
Hirak ne’e, feto na’in-rua inklui mane na’in-12 ne’ebé servisu migrasaun foti iha Aeroportu Internasionál Prezidente Nicolau Lobato hodi prosesa liuhosi investigasaun atu bele hatene nia motivu no kronolojia sira.
Nia dehan, Servisu Investigasaun Kriminál sei halo hela identifikasaun ba sidadaun hirak ne’e.
Jornalista:Hortencio Sacehez
Editór : Zezito Silva
