MNEK diskute koperasaun ho ICRC iha Jeneva
DILI, 02 marsu 2023 (TATOLI) – Ministra Negósiu Estranjeiru no Kooperasaun (MNEK) Adaljiza Albertina Xavier Reis Magno, dehan konsege hasoru malu ho Prezidente Komité Internasionál Kruz Vermelha (ICRC, siglá inglés) Mirjana Egge, iha Jeneva hodi ko’alia kona-ba kooperasaun mútua.
“Hasoru malu ne’e, ami manifesta kompromisu atu hametin no habelár kooperasaun entre Timor-Leste no ICRC iha área asisténsia umanitária no kapasitasaun, inklui lei umanitáriu internasionál ba ofisiál Governu nian no pesoál aplikasaun lei sira”, Ministra Magno hateten liuhosi komunikadu ne’ebé Agência TATOLI asesu, ohin.
Durante enkontru, parte rua troka ideia sira kona-ba integrasaun rejionál ASEAN, asuntu konsesionáriu traballu nian, krize mundiál, ICRC nia papél no dezafíu sira hodi hatán ba krize umanitária mundiál, regra no valór universál sira, prinsípiu asisténsia umanitária, neutralidade, seguransa rejionál no oportunidade iha futuru atu fó formasaun kona-ba implementasaun tratadu umanitáriu internasionál relevante sira ne’ebé Timor-Leste ratifika ona.
Ministra Magno hasoru malu ho Prezidente ICRC durante sesaun regulár Konsellu Direitu Umanu nian ba dala-52 iha Jeneva.
Iha sorumutu ne’e, Ministra Adaljiza akompaña hosi Reprezentante Permanente Timor-Leste nian iha Gabinete Nasaun Unida no Organizasaun Internasionál sira seluk iha Jeneva, Lurdes Bessa, Diretór-Jerál ba Asuntu Multilaterál no Rejionál, Licínio Branco no Vise-Xefe Gabinete, Carlos de Araújo.
Jornalista:Hortencio Sacehez
Editór : Zezito Silva
