MS sei asina akordu ho Indonézia-Austrália ba teste produtu farmaseútiku
DILI, 02 marsu 2023 (TATOLI) – Diretór Nasionál Farmasia no Medikamentu (DNFM) Delfim Ferreira, dehan iha fulan ne’e nia rohan, Ministériu Saúde (MS) sei estabelese akordu ho Badan POM Indonézia no Laboratóriu Therapeutic Goods Administration Austrália atu haree ba teste produtu farmaseútiku iha laboratóriu no fó kapasitasaun ba pesoál tékniku sira.
“Ita sei asina akordu ida ne’e iha fulan ne’e nia rohan no ita sei asina akordu rua hanesan ida husi Badan POM Indonézia no ida husi Laboratóriu Austrália atu haree ba área teste produtu farmaseútiku sira iha laboratóriu no fó kapasitasaun ba pesoál tékniku sira”, Delfim Ferreira dehan.
Nia informa, MS sei haruka pesoál tékniku sira ba Austrália no Indonézia atu aprende iha ne’eba durante fulan ida ka rua atu bele halo servisu kontrola teste laboratóriu ba aimoruk nian iha Timor-Leste.
“Ami sei haruka pesoál tékniku sira ba tuir formasaun iha Indonézia no Austrália bainhira ami asina ona akordu ho sira”, nia subliña.
Nia rekorda, MS halo enkontru bilaterál hodi haruka ona memorandu iha fulan lima ba kotuk atu parte rua bele estuda no responde hodi bele realiza akordu ne’e.
“Ami enkontru bilaterál ho sira no sira konkorda ho ita-nia esbozu memorandu ne’ebé ita haruka antes ba sira iha fulan haat ka lima, entaun sira sei estuda hodi responde iha fulan ida ne’e nia rohan, atu nune’e bele realiza asina akordu ho sira”, nia informa.
Iha akordu ne’e sei haree mós literatura ne’ebé mak atu bele halo servisu, ezemplu MS bele uza estandar farmaseútiku indonézia nian hodi la’o tuir.
Jornalista : Felicidade Ximenes
Editór : Zezito Silva
