DILI, 02 marsu 2023 (TATOLI) – Diretór Nasionál Farmasia no Medikamentu (DNFM) Delfim Ferreira, dehan aimoruk item lima ne’ebé mak halo teste ninia kualidade iha Laboratóriu Therapeutic Goods Administration Austrália sei iha prosesu nia-laran.
“Kona-ba item lima ne’ebé mak MS haruka ba Austrália iha tinan kotuk banhira ami ba vizita direta sira nia nafatin hodi ko’alia ho tékniku sira ne’eba katak sei iha prosesu halo, tanba iha ne’eba la’os ita de’it, maibé iha nasaun pasífiku 10 mak haruka amostra ba hodi teste aimoruk nia kualidade, entaun presiza tempu oituan hodi bele finaliza”, Delfim Ferreira, informa iha Delta Nova, ohin.
Aimoruk tipu lima ne’ebé mak teste iha Laboratóriu Therapeutic Goods Administration Austrália mak kompostu husi Ampicilin, Aspirin, Bisoprolol, Glibenclamide no Oxcytocin.
“Se karik rezultadu sai mak la iha kualidade, ita halo kedas intervensaun hodi rekolla iha fasilidade saúde sira, tanba nia impaktu ba pasiente sira ne’ebé mak konsumu la bo’ot maibé hemu ka konsumu kontinua moras nafatin ka la pasa husi moras ne’e”, nia esplika.
Entertantu, amostra ba tipu aimoruk lima ne’e foti husi armajén SAMES no klinika privada sira ne’ebé durante komunidade konsumu barak.
Jornalista :Felicidade Ximenes
Editór : Zezito Silva
