Vitória Ponta Leste 2-0, Assalam lidera provizóriu tabela klasifikasaun
DILI, 03 marsu 2023 (TATOLI) – Klube primeira divizaun liga Futeból Timor-Leste (LFTL) Assalam FC susesu iha nia jornada da-ruak hodi manán adversáriu AS Ponta Leste ho rezultadu 2-0, hosi rezultadu ne’e lori kedan Assalam lidera provizóriu tabela klasifikasaun ho pontu neen.
Jogu ba ekipa rua ne’e hala’o iha Estádiu Munisipál Dili sesta loraik ne’e, iha ne’ebé lidera hosi árbitru Romario Tety, Juiz liña, Filomeno da Silva, Gabriel Pereira no rezerva Fraancisco Pereira.
Hanesan baibain menutu primeiru jogu la’o ekipa lansa kedan kontra no atake ba malu tuir tékniku no abilidade ekipa ida-idak nian atu buka golu ba sira nia ekipa atu bele hetan vitória.
Jogu la’o furak tebes bainhira animadu hosi adeptu ekipa rua nian ne’ebé haklalak iha tribun leten Estádiu nian hodi fó esperansa ba jogadór sira hodi halao jogu ho brillante tuir saida mak ekipa ida-idak mehi.
Jogu la’o ho velosidade makas tebes entre ekipa rua, Assalam atu hetan oportunidade iha menutu primeiru maibé defeza hosi Ponta Leste nian tenta hasai tutuir bola ba liña liur no halo falla jogu Assalam nian.
Ponta Leste mós tenta hala’o jogu ne’ebé ho velosidade makas maibé Assalam tenta hamate tutuir jogu ne’ebé Ponta Leste halo, tanba ekipa rua kuaze forsa ne’ebé hanesan iha menutu primeiru laiha golu ruma mak akonetese ho nune’e tempu remata tenke empata 0-0.
Durante jogu, maneira hotu ekipa rua halo tantu jogu defensivu no ofensivu maibé jogadór sira nafatin antesipa tanba ho konsentrasaun ne’ebé makas mak hatudu jogu brillante ba bola mania sira ne’ebé tau matan hela ba kampu laran.
Hakur ba segunda parte ekipa rua nafatin mantein ho ritmu jogu ne’ebé iha maibé Ponta Leste nia prestasaun jogu tun tebes kompara ho jogu primeira parte ne’ebé solidu tebes.
Ho prestasaun ne’ebé tun fó vantajen ba ekipa adversáriu halo kontra atake ne’ebé másimu tebes atu bola barullu iha liña Ponta Leste nia oin jogadór Assalam Lourenco Freitas (19) dudu bola ba oin hodi finta defeza Ponta Leste nian lansa kedan bola ba rede lidun Ponta Leste nian halo gurada rede Albino Ximenes (95) tuda aan atu salva maibé la konsege no bola tama liu ba rede laran hametin kedan rezultadu ba 1-0.
Hosi golu ne’e halo adeptu sira haklalak ho lian makas atu halo rahun de’it Estádiu Dili tanba kontente demais, jogadór sira halao halo selebrasaun ba golu ne’e no treinadór Gaspar Amaral mós haksoit kontente.
Espresaun ne’ebé jogadór, treinadór no adeptu Assalam nian halo fó biban ba adeptu, treinadór no jogadór Ponta Leste nian hamrik, tur nonok hodi asiste de’it tanba ne’e mak realidade hosi esforsu duni tanba laos fasil hetan rezultadu nune’e.
Biar nune’e, jogadór Ponta Leste nian la lakon espransa nafatin hatudu jogu ne’ebé brilante maske la fó rezultadu di’ak ba ekipa maibé sira nafatin joga tuir saida mak treinadór fó ona ba sira.
Iha mentutu 65 jogadór Asalam Adikah Godwin (13) komete eru ne’ebé makas iha kampo laran halo árbitru nervozu hodi fó kedan kartaun mean ba jogadór ne’e hodi sai kedan mai liur, la’os jogadór Assalam ne’e de’it maibé fó mós kartaun mean ba jogadór Ponta Leste João Bosco Hale (20) hodi haruka sai mai liur tanba komete mós erru iha kampo laran.
Laiha ona prezensa jogadór rua ne’e nian halo númeru jogadór iha kampo laran menus ba 10-10 de’it, maibé Assalam la lakon esperansa maske hatama ona golu ida.
Jogadór Assalam sira kontinua esforsu nafatin halo jogadór Ponta Leste sira falla iha sira nia jogu nune’e iha menutu 69 jogadór Hasan Ramos prodúz tan golu ida muda rezultadu ba 2-0.
Golu ikus ne’e hanesan golu vitória ba Assalam hodi iha direitu absoluta ba pontu tolu, enkuantu Ponta Leste hela ho derota tanba la konsege esforsu hodi fural golu ruma.
Eskuad Assalam:
Nathaniel Agbozo (30), Husen Costa (27), Jovanio Braz (8), Hermenio de Sousa (14), Lourenco Freitas (19), Francisco da Costa (28), Elias Mesquita (10), Aniso boavida (16), Emidio Braz (4), Edikah Godwin (13), Amir Hamzah (23).
Suplente:
Junilde Pereira (1), Hasan Costa (7), Martino Belo (33), Bonarudin Amin (17), Felisiano da Costa (92), Dom Lucas Braz (3), Tirjon Maia (15), Celsio Pereira (88), Alexandrino Miranda (26), Rahmatullah ghanizada (9), Daniel Appiah (11).
Treinadór: Gaspar Amaral
Eskuad Ponta Leste:
Albino Ximenes (95), Almerito da silva (13), Candido de Oliveira (77), Jaimitu Soares (4), Ricardo Bianco (6), João Halle (20), Jose Pereira (29), Olagar Xavier (18), Jacinto Soares (24), Ejivanio da Costa (11), Expedito da ConceiÇão (11).
Suplente:
Pablo de Jesus (1), Luis Figo Ribeiro (7), Anizu Correia (14), Marito dos santos (9), Silveiro Grascia (27), Samuel Da Cruz (17), Isaac Toni (19), Revelino Martins (22), Lazaro Ximenes (15), Francisco Costa (8).
Treinadór: Lourenco da Costa
Jornalista: Hortencio Sanchez
Editór : Zezito Silva
